ఆకాశాన్నంటిన పివిసి పైపుల ధరలు !

రైతుకు భారంగా సాగు ఖర్చులు

 పైపుల కొరతతో  నిర్మాణం, వ్యవసాయం కుదేలు

 ధరల పెరుగుదలతో సంక్షోభంలో రైతులు, బిల్డర్లు

 నాఫ్తా కొరతతో  మార్కెట్ లో పైపులు కొరత 

(ఆంధ్రప్రభ బ్యూరో, చిత్తూరు.)

 పీవీసీ పైపుల ధరల పెరుగుదలతో రైతులు తీవ్ర ఇబ్బందులను ఎదుర్కొంటున్నారు. ప్రపంచవ్యాప్తంగా జరుగుతున్న యుద్ధాల ప్రభావం సాధారణ ప్రజల జీవన విధానాన్ని మాత్రమే కాకుండా వ్యవసాయ రంగాన్నీ తీవ్రంగా దెబ్బతీస్తోంది. ముఖ్యంగా క్రూడ్ ఆయిల్, నేచురల్ గ్యాస్ సరఫరాలో వచ్చిన అంతరాయం కారణంగా పీవీసీ పైపుల తయారీపై తీవ్ర ప్రభావం పడింది. దీనివల్ల రైతులు ఎన్నో ఇబ్బందులు ఎదుర్కొంటున్నారు. మామిడి గుజ్జు ఎగుమతులు మామిడి కవర్ల ముడి సరుకు దిగుమతికి అమెరికా ఇరాన్ యుద్ధం అడ్డంకిగా మారింది. అలాగే యూరియా యూరియా, అవసరమైన ముడి సరుకులు కూడా దిగుమతులు ఆగిపోయాయి. ఆ ప్రభావం పివిసి పైపుల మీద కూడా పడింది. ముడి సరుకుల దిగుమతి తాగడంతో మార్కెట్లో పివిసి పైపులకు భారీగా డిమాండ్ ఏర్పడింది. దీంతో పివిసి పైపులు ధరలు అమాంతరం పెరిగిపోయాయి. చిత్తూరు జిల్లాలో మామిడికాయల సీజన్ ప్రారంభం కావడంతో రైతులకు పీవీసి పైపులు లభించక తీవ్ర ఇబ్బందులు పడుతున్నారు. పివిసి పైపులు ధరలు రెండు రెట్లు పెరగడంతో పైపులు కొనలేక, వ్యవసాయం చేయలేక రైతులు తీవ్రంగా నష్టపోతున్నారు.

పీవీసీ పైపులు వ్యవసాయానికి ప్రాణాధారం లాంటివి. భూగర్భ జలాలను మోటార్ల ద్వారా పొలాలకు పంపేందుకు, డ్రిప్ ఇరిగేషన్ వ్యవస్థలు అమలు చేయడానికి, నీటి పారుదల కోసం ఇవి కీలక పాత్ర పోషిస్తాయి. అయితే ఇటీవల పీవీసీ పైపుల ధరలు ఒక్కసారిగా 100 శాతం వరకు పెరగడంతో రైతులకు పెద్ద ఆర్థిక భారంగా మారింది. పీవీసీ తయారీలో ఉపయోగించే నాఫ్తా, ఇథిలీన్ వంటి ముడి పదార్థాలు క్రూడ్ ఆయిల్ నుంచి ఉత్పత్తి అవుతాయి. ప్రస్తుతం అంతర్జాతీయ యుద్ధాల కారణంగా ఈ ముడి పదార్థాల సరఫరా తగ్గిపోయింది. ముఖ్యంగా హార్ముజ్ జలసంధి ద్వారా భారతదేశానికి వచ్చే క్రూడ్ ఆయిల్ నౌకల సంఖ్య తగ్గిపోవడంతో రిఫైనరీల ఉత్పత్తి పడిపోయింది. దాంతో పీవీసీ తయారీ కంపెనీలు ఉత్పత్తి తగ్గించుకోవాల్సి వచ్చింది. ఈ పరిస్థితుల్లో మార్కెట్‌లో పైపుల కొరత ఏర్పడింది. డీలర్ల వద్ద స్టాక్ లేకపోవడంతో రైతులు అవసరమైనప్పుడు పైపులు కొనలేకపోతున్నారు. కొన్ని ప్రాంతాల్లో పైపులు అందుబాటులో లేకపోవడంతో సాగు పనులు వాయిదా పడుతున్నాయి. పంటల సీజన్‌లో ఇలాంటి పరిస్థితి రైతులకు మరింత ఇబ్బంది కలిగిస్తోంది. ఇప్పటికే ఉన్న పైపుల ధరలు కూడా భారీగా పెరిగాయి. ముందుగా రూ.100కి లభించిన పైపు ఇప్పుడు రూ.200కు చేరింది. పెద్ద ఎత్తున సాగు చేసే రైతులకు ఇది లక్షల రూపాయల అదనపు ఖర్చుగా మారుతోంది. ముఖ్యంగా బోర్లు వేసే రైతులు, డ్రిప్ వ్యవస్థలు అమలు చేసే వారు తీవ్రంగా నష్టపోతున్నారు. ఇదే సమయంలో వ్యవసాయ రంగంలో ఇతర ఖర్చులు కూడా పెరిగాయి. ఎరువులు, విత్తనాలు, కూలీల ఖర్చులు పెరుగుతున్న నేపథ్యంలో పైపుల ధరల పెరుగుదల రైతులకు డబుల్ షాక్ ఇచ్చింది. రైతు పెట్టుబడి పెరుగుతున్నప్పటికీ దిగుబడులపై అనిశ్చితి కొనసాగుతోంది. పీవీసీ పైపుల కొరత కారణంగా కొన్ని ప్రాంతాల్లో రైతులు పాత పైపులనే మళ్లీ ఉపయోగించాల్సి వస్తోంది. దీని వల్ల నీటి లీకేజీలు పెరిగి నీటి వృథా అవుతోంది. చివరకు పంటల దిగుబడిపై కూడా ప్రభావం పడుతోంది.

నిర్మాణరంగం కూడా కుదేలు

మరోవైపు నిర్మాణ రంగంలో కూడా ఇదే పరిస్థితి కనిపిస్తోంది. ఇళ్ల నిర్మాణంలో ఉపయోగించే పైపులు, శానిటరీ వస్తువుల ధరలు పెరగడంతో బిల్డర్లు పనులను నిలిపివేస్తున్నారు. దీని ప్రభావం పరోక్షంగా గ్రామీణ ఉపాధిపై పడుతోంది. ప్లంబర్లు, కార్మికులు పని లేక ఇబ్బందులు పడుతున్నారు. సిరామిక్ పరిశ్రమ కూడా ఇదే సమస్యను ఎదుర్కొంటోంది. నేచురల్ గ్యాస్ సరఫరా తగ్గడంతో ఉత్పత్తి తగ్గి, టైల్స్, కమోడ్లు, వాష్ బేసిన్ల ధరలు 20 శాతం వరకు పెరిగాయి. ఈ పరిస్థితి నిర్మాణ రంగాన్ని మరింత మందగింపజేసింది. ఈ మొత్తం పరిస్థితి చివరికి రైతు మీదే భారంగా పడుతోంది. సాగు ఖర్చులు పెరగడం, అవసరమైన సామగ్రి అందుబాటులో లేకపోవడం వల్ల రైతులు ఆందోళన చెందుతున్నారు. కొంతమంది రైతులు సాగు విస్తీర్ణాన్ని తగ్గించుకోవాల్సిన పరిస్థితి కూడా ఎదురవుతోంది.

నిపుణుల అభిప్రాయం ప్రకారం, ఈ సమస్యకు పరిష్కారం క్రూడ్ ఆయిల్ సరఫరా స్థిరపడడంలోనే ఉంది. అంతర్జాతీయ పరిస్థితులు మెరుగుపడితేనే ముడి పదార్థాల ధరలు తగ్గి, పీవీసీ ఉత్పత్తుల ధరలు స్థిరపడే అవకాశం ఉంది. ఇక ప్రభుత్వం కూడా ఈ పరిస్థితిని గమనించి రైతులకు సబ్సిడీలు, రాయితీలు అందించాల్సిన అవసరం ఉంది. ముఖ్యంగా డ్రిప్ ఇరిగేషన్, మైక్రో ఇరిగేషన్ పథకాల ద్వారా రైతులకు సహాయం చేయాల్సిన అవసరం ఉంది. మొత్తానికి, పీవీసీ పైపుల ధరల పెరుగుదల ఒక సాధారణ మార్కెట్ మార్పు మాత్రమే కాదు… ఇది రైతు ఆర్థిక వ్యవస్థపై తీవ్ర ప్రభావం చూపుతున్న సంక్షోభం. పరిస్థితులు త్వరగా చక్కబడకపోతే వ్యవసాయ రంగం మరింత ఒత్తిడిని ఎదుర్కొనే ప్రమాదం ఉంది.