బాల, బాలికలను ఇళ్లలో సమానంగా చూడాలి

నేడే జాతీయ బాలిక దినోత్సవం

(ఆంధ్రప్రభ బ్యూరో, చిత్తూరు.) 

ఆడపిల్లల్లో సామాజిక అవగాహన పెంచడం, విద్య, ఆరోగ్య రంగాల్లో బాలికలను మరింత ప్రోత్సాహించడం కోసం జాతీయ బాలిక దినోత్సవంను ప్రత్యేకంగా కేటాయించారు. మాహిళా శిశు అభివృద్ధి, మంత్రిత్వ శాఖ ద్వారా ఆడపిల్లలకు అడ్డుగా ఉన్న ఎన్నో విషయాలపై పోరాడడానికి కేంద్ర ప్రభుత్వం ‘జాతీయ బాలిక అభివృద్ధి మిషన్’ కార్యక్రమాన్ని చేపట్టింది. ఆడపిల్లల అభివృద్ధిపై ప్రత్యేక దృష్టి సారించింది. సమాజంలో బాలికల సంరక్షణ పట్ల, బాలికల హక్కులు, వైద్య సంరక్షణ, విద్య, పోషకాహారం, వివాహం సామాజిక ఎదుగుదల వంటి అంశాలపై అవగాహన కల్పిస్తూ ఏటా జనవరి 24ను ‘జాతీయ బాలిక దినోత్సవం’గా  కేంద్రం నిర్వహిస్తోంది. భారత ప్రభుత్వం 2008 నుంచి జనవరి 24ను నేషనల్‌‌‌‌ గర్ల్‌‌‌‌ చైల్డ్ డేగా ప్రకటించింది.

సమాజంలో కొంత మార్పు వచ్చినప్పటికీ దేశంలో ఎక్కడో ఒకచోట ఆడపిల్లలపై అత్యాచారాలు కొనసాగుతూనే ఉన్నాయి. బాలురు, బాలికల మధ్య అసమానతలను దూరంచేసేలా ప్రజల్లో అవగాహన కలిగించేందుకు జరుపుతున్నదే ఈ ప్రత్యేక దినోత్సవం. కేంద్ర మహిళా, శిశు సంక్షేమ శాఖ ఈ దినోత్సవాన్ని ఘనంగా నిర్వహిస్తోంది. ఈ సంవత్సరం జాతీయ బాలికా దినోత్సవాన్ని సమానత్వం. సాధికారత.” అనే ధీమ్ దేశంలో జరుపుకుంటున్నారు. జాతీయ బాలికా దినోత్సవాన్ని జరుపుకోవడం ఉద్దేశ్యం దేశంలోని బాలికలకు వారి హక్కుల గురించి అవగాహన కల్పించడం. జాతీయ బాలికా దినోత్సవం బాలికలకు శిక్ష, ఆరోగ్యం, ఉపాధిపై అవగాహన కల్పిస్తుంది. బాలికలే లైంగిక వేధింపుల ప్రాథమిక బాధితులుగా కొనసాగుతున్నారు. సమాజంలో అత్యంత దుర్బలమైన వర్గాలలో ఆడపిల్ల ఒకటి. ఇంకా లైంగిక హింస నేరాల నుండి వారిని రక్షించాల్సిన అవసరం చాలా ఉంది. బహిరంగ ప్రదేశాల్లో మహిళలపై లైంగిక హింస మరింత సమానమైన అభివృద్ధికి భారీ అవరోధంగా మారుతుంది. ఇది విద్య, ఆరోగ్య సంరక్షణ మరియు పౌర సౌకర్యాల వంటి చైతన్యం  సేవలకు ప్రాప్యతను పరిమితం చేస్తుంది. భారతదేశంలో ఆడపిల్ల పెళ్లి మరో ఆందోళనకరమైన అంశం. ఒక అమ్మాయికి వివాహం చేసుకోవడానికి చట్టబద్ధమైన వయస్సు 18 సంవత్సరాలు అయినప్పటికీ, ప్రపంచంలోనే అత్యధిక సంఖ్యలో బాల వధువులకు భారతదేశం నిలయంగా ఉంది. యునిసెఫ్  నివేదిక ప్రకారం, భారతదేశంలో ప్రతి సంవత్సరం 18 సంవత్సరాల కంటే తక్కువ వయస్సు ఉన్న 1.5 మిలియన్ల మంది బాలికలు వివాహం చేసుకుంటున్నారు. పాఠశాలలో అధిక సంఖ్యలో బాలికల నమోదును చూడటం చాలా ప్రోత్సాహకరంగా ఉన్నప్పటికీ, వారి విద్యను కొనసాగించే బాలికల శాతం ఇప్పటికీ తక్కువగా ఉంది. 50.2 శాతం మంది పురుషులతో పోలిస్తే కేవలం 41 శాతం స్త్రీలు మాత్రమే పాఠశాల విద్యను అభ్యసిస్తున్నారు. అమ్మాయిలు, అబ్బాయిలు ఇద్దరికీ విద్యను అందించడం చాలా ముఖ్యం. బాల్య వివాహాల వంటి ఆచారాలను అరికట్టడమే కాకుండా సమాజాభివృద్ధికి మార్గం సుగమం చేయడమే బాలికల దినోత్సవ ముఖ్య ఉద్దేశం. చట్టవిరుద్ధమైన బాల్య వివాహాలకు ప్రాథమిక కారణం విద్య లేకపోవడం, పేద జీవన పరిస్థితులు, ఇప్పటికీ ఆడపిల్లను కుటుంబానికి భారంగా భావించే లింగ సామాజిక నిబంధనలు. బాలికల వివాహానికి చట్టబద్ధమైన వయస్సును 18 నుండి 21 సంవత్సరాలకు పెంచే బిల్లును భారతదేశ ప్రధానమంత్రి ప్రతిపాదించారు. బాలికలకు  లింగం ఆధారంగా వివక్ష తరచుగా ఇంట్లోనే మొదలవుతుంది. బాలికలను వారి ఇళ్లలో సమానంగా చూసినట్లయితే, కుటుంబం వారి విద్య, వృత్తికి మద్దతుగా ఉంటే, అది వారి అభివృద్ధికి కారణం అవుతుంది. ఆడపిల్ల, మగపిల్లల మధ్య వివక్ష చూపడం సమాజంలో ఇప్పటికీ ప్రబలంగా ఉన్న ఆచారం. ఆడ బిడ్డ పుట్టినప్పటి నుండి లింగ ఆధారిత వివక్షను ఎదుర్కొంటుంది. భారతదేశంలో 67 శాతం మంది పురుషులతో పోలిస్తే 37 శాతం మంది మహిళలు మాత్రమే ఆరోగ్య సంరక్షణ సౌకర్యాలను పొందుతున్నారని తాజాగా ఓ అధ్యయనంలో తేలింది. భారతదేశంలో ప్రసూతి మరణాల రేటు కూడా ఎక్కువగా ఉంది. ఆరోగ్య సంరక్షణలో మెరుగుదల అదనపు స్త్రీ మరణాల రేటును తగ్గించడంలో సహాయపడటమే కాకుండా మహిళలకు అందుబాటులో ఉండే వాతావరణాన్ని కూడా సృష్టించాలి. ఆడపిల్లలకు సరైన విద్య, వైద్యం అందేలా పాలసీలను ప్రవేశపెట్టడం, శ్రామికశక్తిలో మహిళా భాగస్వామ్యాన్ని ప్రోత్సహించడం, విధాన రూపకల్పన, నాయకత్వ పాత్రలలో మహిళా ప్రాతినిధ్యాన్ని పెంచడం, బహిరంగ ప్రదేశాల్లో మహిళా భద్రతా చర్యలు, మహిళలపై లైంగిక హింసకు కఠిన శిక్షలు అవసరం.

*బాలికల విద్యను పెంచడానికి కేజీబీవీలు* 

.ప్రాథమిక స్థాయిలో బడి మానేసిన బాలికలకు 2004లో కేంద్ర ప్రభుత్వం కస్తూరిబా గాంధీ విద్యాలయాలు  ప్రారంభించింది..వీటిల్లో  బడి మానేసిన, బడిలో చేరని షెడ్యూల్ కులాలు తెగలు ఇతర వెనుకబడిన తరగతులు , మైనారిటీ   తరగతులకు చెందిన బాలికలకు అందుబాటులో గుణాత్మక విద్యను భోధిస్తారు. చిత్తూరు జిల్లాలో 8 కేజీబీవీలు ఉన్నాయి. కుప్పం, గంగవరం, గుడిపల్లి, శాంతిపురం, బైరెడ్డిపల్లి, పుంగనూరు, రొంపిచర్ల, రామకుప్పంలలో వీటిని ఏర్పాటు చేశారు..ప్రస్తుతం కేజీబీవీలు  2007 నుండి సమగ్ర శిక్షణ  అభియాన్ ఆధ్యర్యంలో నడుస్తున్నాయి.  

2019-20 సంవత్సరం నుండి కస్తూరి గాంధీ బాలిక విద్యాలయాల్లో ఇంటర్మీడియట్ విద్యను కూడా ప్రారంభించారు.  

జిల్లాలో కేజీబీవీల్లో   2023-24 పదవ తరగతి పరీక్షా ఫలితాలు 97 శాతం కాగా, ఇంటర్మీడియట్ పరీక్ష ఫలితాలలో 96.5 శాతం సాధించారు.