టీడీపీ క్యాడర్‌లో ఆత్మవిశ్వాసం నింపిన బాబు పర్యటన
టీడీపీ క్యాడర్‌లో ఆత్మవిశ్వాసం నింపిన బాబు పర్యటన
అభివృద్ధి పనులకు శ్రీకారం.. అన్ని వర్గాలతో సీఎం మమేకం
వైసీపీ విమర్శలకు ఘాటుగా బదులిచ్చిన చంద్రబాబు
స్థానిక సంస్థల ఎన్నికలకు పార్టీ శ్రేణులకు దిశానిర్దేశం
కుప్పం అభివృద్ధిపై స్పష్టమైన ప్రణాళిక
(చిత్తూరు బ్యూరో, ఆంధ్రప్రభ.)
ముఖ్యమంత్రి నారా చంద్రబాబు నాయుడు రెండు రోజుల కుప్పం పర్యటన ఇటు అభివృద్ధి కార్యక్రమాలకు, అటు తెలుగుదేశం పార్టీ శ్రేణుల్లో ఉత్సాహానికి వేదికగా నిలిచింది. సుమారు రెండు నెలల వ్యవధిలోనే మరోసారి కుప్పం వచ్చిన ముఖ్యమంత్రి వరుస కార్యక్రమాల్లో పాల్గొని రైతులు, మహిళలు, యువత, సంక్షేమ పథకాల లబ్ధిదారులు, పార్టీ కార్యకర్తలతో మమేకమయ్యారు. అభివృద్ధి పనులకు శంకుస్థాపనలు, ప్రారంభోత్సవాలతో పాటు పార్టీ భవిష్యత్ కార్యాచరణపైనా దిశానిర్దేశం చేశారు. బహిరంగ సభ వేదిక మీద నుంచి గొడ్డలి పార్టీ మీద ఘాటు విమర్శలు కుప్పించారు. విధ్వంసం వినాశనం వారి అజెండా అని దుయ్యబట్టారు. రక్తపాతం మరిగిన శంషాబాద్లకు బ్యాలెట్ తో బుద్ధి చెప్పాలని పిలుపునిచ్చారు. రానున్న స్థానిక సంస్థల ఎన్నికలలో ఒక్క స్థానంలో కూడా వైసిపి గెలవకూడదని కేడర్ కు నిర్దేశించారు. డీఎస్సీ పైన జరుగుతున్న విష ప్రచారానికి ఘాటుగా స్పందించారు. దమ్ముంటే అసెంబ్లీకి రావాలని లేకుంటే కోర్టుకు వెళ్లాలని సవాలు చేశారు. ఉపాధ్యాయుల మీద దాడులు చేసినా, వారిని ఎక్కించబడుతున్న సహించేది లేదని హెచ్చరించారు. ఒకవైపు అభివృద్ధి మంత్రం జపిస్తుంది మరోవైపు వైసీపీ మీద పదునైన విమర్శలను ఎక్కుపెట్టారు.
తొలి రోజు కుప్పం మున్సిపాలిటీలో రూ.10 కోట్లతో నిర్మించనున్న ఆర్డీఓ, ఏఎస్పీ కార్యాలయాలకు శంకుస్థాపన చేశారు. రూ.3.30 కోట్లతో నిర్మించిన సమగ్ర ఘన వ్యర్థాల నిర్వహణ ప్లాంట్, మెటీరియల్ రికవరీ కేంద్రాన్ని ప్రారంభించారు. 10 ఎకరాల్లో రూ.2.70 కోట్లతో చేపట్టనున్న మల్లానూరు జూనియర్ కళాశాల పనులకు భూమిపూజ చేశారు. మున్సిపాలిటీలో రూ.38 కోట్ల విలువైన పనులకు శ్రీకారం చుట్టారు. వ్యవసాయ ఫీడర్ల కోసం 15 మెగావాట్ల పీఎం కుసుమ్ సౌర విద్యుత్ ప్రాజెక్టులను ప్రారంభించారు. కుప్పం అభివృద్ధిని ఆర్థిక ప్రగతితో అనుసంధానించే దిశగా రైల్వే, రహదారులు, పట్టణ మౌలిక వసతులపై చంద్రబాబు దృష్టి సారించారు. దాదర్–పుదుచ్చేరి ఎక్స్‌ప్రెస్ రైలుకు కుప్పంలో అదనపు నిలుపుదలను ప్రారంభించారు. కుప్పం మీదుగా నడిచే మరిన్ని రైళ్లకు నిలుపుదల కల్పించడంతో పాటు రైల్వే అనుసంధానాన్ని విస్తరించే చర్యలు చేపడతామని తెలిపారు. కుప్పాన్ని ఆర్థిక కేంద్రంగా తీర్చిదిద్దుతామని పేర్కొన్నారు. రైతు బజార్‌కు శంకుస్థాపన చేసిన సీఎం రైతులతోనూ మమేకమయ్యారు. రైతు బజార్‌లో శీతల గిడ్డంగి, వ్యర్థాల నిర్వహణ, సౌర విద్యుత్ వంటి సదుపాయాలు కల్పించాలని సూచించారు. ప్రకృతి వ్యవసాయం చేస్తున్న మహిళా రైతులతో మాట్లాడి వారి సాగు వివరాలను తెలుసుకున్నారు. కుప్పం నియోజకవర్గంలో 24 వేల మంది రైతులు 28 వేల ఎకరాల్లో సాగు చేస్తున్నట్లు అధికారులు వివరించారు. సంక్షేమ పథకాల లబ్ధిదారులతో నిర్వహించిన ముఖాముఖి కార్యక్రమంలోనూ చంద్రబాబు విస్తృతంగా పాల్గొన్నారు. తల్లికి వందనం, స్త్రీశక్తి, అన్నదాత సుఖీభవ, ఎన్టీఆర్ భరోసా తదితర పథకాల లబ్ధిదారులతో మాట్లాడి వారి అనుభవాలను తెలుసుకున్నారు. యువతతోనూ మమేకమై స్థానికంగా అవకాశాలు పెంచే అంశాలపై మాట్లాడారు. దీంతో పర్యటన కేవలం అధికారిక కార్యక్రమాలకే పరిమితం కాకుండా ప్రజలతో నేరుగా అనుసంధానమయ్యేలా సాగింది.
వైసీపీపై ఘాటైన విమర్శలు
కుప్పం బహిరంగ సభలో వైసీపీపై చంద్రబాబు తీవ్రస్థాయిలో విమర్శలు చేశారు. ముఖ్యంగా డీఎస్సీ స్పోర్ట్స్ కోటా ఉపాధ్యాయుల నియామకాలపై వస్తున్న ఆరోపణలు, ఉపాధ్యాయులపై జరిగిన దాడుల అంశాన్ని ప్రస్తావించారు. నియామక ప్రక్రియపై అభ్యంతరాలు ఉంటే న్యాయస్థానాలను ఆశ్రయించవచ్చని, ఉపాధ్యాయులపై దాడులు చేయడం మాత్రం సరికాదని అన్నారు. డీఎస్సీ నియామకాలపై ఆరోపణలు చేస్తున్న వైసీపీ నేతలు అసెంబ్లీకి వచ్చి చర్చించాలని, ఆధారాలతో సమాధానం ఇస్తామని సవాల్ చేశారు. తన ప్రభుత్వ హయాంలో డీఎస్సీ నోటిఫికేషన్లలో అవినీతికి, ప్రశ్నపత్రాల లీకేజీకి తావులేదని చంద్రబాబు పేర్కొన్నారు. 14 డీఎస్సీలు నిర్వహించినప్పటికీ చిన్న పొరపాటు కూడా జరగలేదని ఆయన చెప్పారు. వైసీపీ హయాంలో ఇచ్చిన క్రీడా ధ్రువపత్రాలతో ఉద్యోగాల్లోకి వచ్చిన వారిని ఇప్పుడు ఫేక్‌గా పేర్కొంటున్నారని విమర్శించారు. ఉపాధ్యాయులపై దాడులను చూస్తూ ఊరుకోబోమని హెచ్చరించారు. 2019–24 మధ్య రాష్ట్రంలో విధ్వంసం జరిగిందని, నాటి పాలనలో దౌర్జన్యాలకు పాల్పడ్డారని చంద్రబాబు ఆరోపించారు. కుప్పంలోనూ గతంలో తనను ఇబ్బందులకు గురిచేశారని పేర్కొన్నారు. రాజకీయాల్లో హింసకు తావులేదని, కుప్పం శాంతియుత వాతావరణాన్ని కాపాడుకోవాలని అన్నారు. ఫ్లెక్సీలకు జంతుబలి, రక్తాభిషేకాల వంటి చర్యలను కూడా ఆయన సభలో ప్రస్తావించారు. అమరావతి అభివృద్ధి, జే బ్రాండ్స్, ఏపీపీఎస్సీ అంశాలపైనా వైసీపీని చంద్రబాబు ప్రశ్నించారు. రాజకీయ విమర్శలకు ఆధారాలతో సమాధానం ఇస్తామని పేర్కొన్నారు. అయితే ఆయన చేసిన ఆరోపణలు ముఖ్యమంత్రి రాజకీయ ప్రసంగంలో చేసినవేనని వార్తా కథనాల్లో పేర్కొన్నారు. రెండో రోజు శాంతిపురం మండలం గుండిశెట్టిపల్లె వద్ద హంద్రీ నీవా జలాలకు జలహారతి ఇచ్చిన చంద్రబాబు, గుడిపల్లి మండలం యామనూరు వద్ద బీరగానిపల్లె రిజర్వాయర్ నిర్మాణానికి శంకుస్థాపన చేశారు. నీటి వసతులు, సాగు, రవాణా, పట్టణ మౌలిక వసతుల అభివృద్ధికి ప్రాధాన్యం ఇచ్చేలా పర్యటన సాగింది.
ఎన్నికలకు పార్టీ శ్రేణులకు దిశానిర్దేశం
పర్యటనలో భాగంగా నిర్వహించిన పార్టీ సమావేశంలో రానున్న స్థానిక సంస్థల ఎన్నికలను దృష్టిలో ఉంచుకుని పార్టీ శ్రేణులకు చంద్రబాబు దిశానిర్దేశం చేశారు. ప్రతి వార్డు, ప్రతి పంచాయతీలో సమన్వయంతో పనిచేయాలని సూచించారు. ప్రజలకు అందుతున్న అభివృద్ధి, సంక్షేమ కార్యక్రమాలను వివరించి క్షేత్రస్థాయిలో పార్టీని బలోపేతం చేయాలని కోరారు. మొత్తంగా రెండు రోజుల పర్యటనలో చంద్రబాబు అభివృద్ధి కార్యక్రమాలతో పాటు ప్రజలు, లబ్ధిదారులు, రైతులు, మహిళలు, యువతతో నేరుగా మమేకమయ్యారు. బహిరంగ సభలో వైసీపీపై ఘాటైన విమర్శలు చేస్తూ పార్టీ శ్రేణుల్లో ఉత్సాహాన్ని నింపారు. మరోవైపు హింసకు తావులేని రాజకీయ వాతావరణం అవసరమని స్పష్టం చేశారు. అభివృద్ధి కార్యక్రమాలు, ప్రజలతో ముఖాముఖి, పార్టీ సమావేశం కలిపి సాగిన పర్యటన కుప్పం టీడీపీ క్యాడర్‌లో ఆత్మవిశ్వాసాన్ని పెంచినట్లుగా పార్టీ వర్గాలు భావిస్తున్నాయి.
