చిత్తూరు కార్పొరేషన్‌లో ఇక 60 వార్డులు
చిత్తూరు కార్పొరేషన్‌లో ఇక 60 వార్డులు
పునర్విభజనకు గెజిట్‌ నోటిఫికేషన్‌ జారీ
50 నుంచి 60కి పెంపునకు అధికారిక ముద్ర
స్థానిక సంస్థల ఎన్నికలకు మరింత స్పష్టత..
రాజకీయ వర్గాల్లో పెరిగిన ఆసక్తి
(చిత్తూరు బ్యూరో, ఆంధ్రప్రభ.)
చిత్తూరు నగర పాలక సంస్థలో వార్డుల సంఖ్య పెంపుపై నెలకొన్న ఉత్కంఠకు తెరపడింది. చిత్తూరు కార్పొరేషన్‌లో ఇప్పటివరకు ఉన్న 50 వార్డులను 60 వార్డులకు పెంచుతూ రాష్ట్ర ప్రభుత్వం అధికారికంగా నిర్ణయం తీసుకుంది. ఈ మేరకు మున్సిపల్‌ పరిపాలన శాఖ 60 వార్డుల పునర్విభజనకు సంబంధించిన నోటిఫికేషన్‌ను ప్రభుత్వ గెజిట్‌లో ప్రచురించింది. సెప్టెంబర్ 14న వెలువడిన ఆంధ్రప్రదేశ్‌ రాజపత్రంలో ఈ నోటిఫికేషన్‌ ప్రచురితమైంది. దీంతో చిత్తూరు నగర పాలక సంస్థలో 60 వార్డుల ఏర్పాటుకు అధికారికంగా మార్గం సుగమమైంది.
వార్డుల పునర్విభజనకు సంబంధించి మున్సిపల్‌ పరిపాలన శాఖ కమిషనర్‌, డైరెక్టర్‌ జారీ చేసిన మార్గదర్శకాలు, చిత్తూరు నగర పాలక సంస్థ సర్వసభ్య సమావేశంలో తీసుకున్న తీర్మానం తదితర అంశాలను పరిగణనలోకి తీసుకుని ప్రభుత్వం ఈ నిర్ణయం తీసుకున్నట్లు గెజిట్‌ నోటిఫికేషన్‌లో పేర్కొన్నారు. ఆర్‌వోసీ నం.893/2026/జి1, తేదీ 13.09.2026 ద్వారా వార్డుల పునర్విభజనకు సంబంధించిన అధికారిక ప్రక్రియను ఖరారు చేశారు. చిత్తూరు కార్పొరేషన్‌లో వార్డుల సంఖ్యను 50 నుంచి 60కి పెంచే అంశం కొంతకాలంగా రాజకీయంగా చర్చనీయాంశంగా ఉంది. ముఖ్యంగా రానున్న స్థానిక సంస్థల ఎన్నికల నేపథ్యంలో వార్డుల సంఖ్య పెంపు, వాటి పరిధుల నిర్ణయం, రిజర్వేషన్ల అంశాలపై రాజకీయ పార్టీల్లో ఆసక్తి నెలకొంది. ఈ నేపథ్యంలో ప్రభుత్వం గెజిట్‌ జారీ చేయడంతో వార్డుల పునర్విభజనకు సంబంధించి నెలకొన్న అనిశ్చితికి తెరపడినట్లయింది.
హైకోర్టు కేసుతో ఉత్కంఠ
చిత్తూరు మున్సిపల్‌ కార్పొరేషన్‌ వార్డుల పునర్విభజన అంశంపై వైఎస్సార్‌ కాంగ్రెస్‌ పార్టీ రాష్ట్ర హైకోర్టును ఆశ్రయించిన విషయం కూడా రాజకీయంగా ప్రాధాన్యం సంతరించుకుంది. అయితే వార్డుల పునర్విభజనకు సంబంధించి దాఖలైన కేసును హైకోర్టు కొట్టివేసింది. దీంతో ప్రభుత్వం ముందుగా నిర్దేశించిన నిబంధనల ప్రకారం వార్డుల పునర్విభజన ప్రక్రియను కొనసాగించేందుకు మార్గం ఏర్పడింది. ఇదే సమయంలో చిత్తూరు ఎమ్మెల్యే మరో 3 వార్డులను అదనంగా పెంచాలని చేసిన విజ్ఞప్తి కూడా పరిగణనలోకి తీసుకోలేదని సమాచారం. ఫలితంగా గతంలో ప్రభుత్వం నిర్దేశించిన నిబంధనలకు అనుగుణంగా చిత్తూరు కార్పొరేషన్‌లో వార్డుల సంఖ్యను 50 నుంచి 60కి పెంచే ప్రక్రియను అధికారులు ముందుకు తీసుకెళ్లారు. చిత్తూరు నగర పాలక సంస్థ సర్వసభ్య సమావేశంలోనూ వార్డుల సంఖ్య పెంపునకు సంబంధించి నిర్ణయం తీసుకున్న నేపథ్యంలో, ఆ తీర్మానం, మున్సిపల్‌ పరిపాలన శాఖ మార్గదర్శకాలు, ప్రభుత్వం నిర్దేశించిన నిబంధనలను పరిగణనలోకి తీసుకుని తుది ప్రక్రియ పూర్తయింది. తాజాగా ప్రభుత్వం దీనికి ఆమోదం తెలపడంతో 60 వార్డుల ఏర్పాటుకు అధికారిక గుర్తింపు లభించింది.
ఎన్నికలకు కీలక పరిణామం
వార్డుల సంఖ్య 60కి పెరగడంతో రానున్న చిత్తూరు నగర పాలక సంస్థ ఎన్నికలపై దీని ప్రభావం ఉండనుంది. గతంలో 50 వార్డుల ప్రాతిపదికన ఉన్న రాజకీయ సమీకరణాలు ఇకపై 60 వార్డుల పరిధికి అనుగుణంగా మారాల్సి ఉంటుంది. కొత్తగా ఏర్పడే వార్డుల పరిధులు, ఓటర్ల సంఖ్య, జనాభా ప్రాతిపదిక, రిజర్వేషన్లు తదితర అంశాలు తదుపరి దశలో కీలకంగా మారనున్నాయి. ఇప్పటికే రాష్ట్రవ్యాప్తంగా స్థానిక సంస్థల ఎన్నికలపై రాజకీయ పార్టీలు దృష్టి సారించాయి. గ్రామ పంచాయతీలు, మండల పరిషత్‌లు, జిల్లా పరిషత్‌లు, మున్సిపాలిటీలు, నగర పాలక సంస్థల ఎన్నికలపై చర్చలు జరుగుతున్న సమయంలో చిత్తూరు కార్పొరేషన్‌ వార్డుల పునర్విభజనకు గెజిట్‌ నోటిఫికేషన్‌ రావడం ప్రాధాన్యత సంతరించుకుంది. ఇక 60 వార్డుల ప్రాతిపదికన ఎన్నికల ప్రక్రియ ముందుకు సాగేందుకు అవసరమైన తదుపరి చర్యలు చేపట్టే అవకాశం ఉంది.
మారనున్న రాజకీయ సమీకరణాలు
చిత్తూరు నగరంలో వార్డుల సంఖ్య పెరగడంతో ఆయా ప్రాంతాల్లో రాజకీయ సమీకరణాలు కూడా మారే అవకాశం ఉంది. 50 వార్డుల పరిధిలో ఉన్న ప్రస్తుత రాజకీయ లెక్కలు 60 వార్డులకు అనుగుణంగా పునఃసమీక్షించుకోవాల్సిన పరిస్థితి ఏర్పడింది. కొత్త వార్డుల పరిధిలో తమకు అనుకూలమైన అభ్యర్థుల కోసం ప్రధాన రాజకీయ పార్టీలు అన్వేషణ ప్రారంభించే అవకాశం ఉంది. స్థానికంగా బలమైన నాయకులు, ప్రజల్లో పరిచయం ఉన్నవారు, సామాజిక సమీకరణాల్లో ప్రభావం చూపగలిగిన వారికి ప్రాధాన్యం పెరగనుంది. మరోవైపు కొత్త వార్డుల ఏర్పాటుతో రిజర్వేషన్లు ఏ విధంగా ఖరారవుతాయన్న అంశంపై కూడా ఆశావహుల్లో ఉత్కంఠ నెలకొంది. వార్డుల తుది సరిహద్దులు, జనాభా వివరాలు, రిజర్వేషన్లు అధికారికంగా వెల్లడైన తర్వాతే ఆయా డివిజన్లలో పోటీ చేసే అభ్యర్థులపై రాజకీయ పార్టీల్లో స్పష్టత వచ్చే అవకాశం ఉంది.
గెజిట్‌తో అధికారిక ముద్ర
ఇప్పటివరకు వార్డుల సంఖ్య పెంపుపై రాజకీయ, పరిపాలనా స్థాయిలో కొనసాగిన చర్చలకు తాజాగా గెజిట్‌ నోటిఫికేషన్‌తో అధికారిక ముద్ర పడింది. చిత్తూరు నగర పాలక సంస్థలో ఇకపై 60 వార్డులే ప్రాతిపదికగా ఉండనున్నాయి. ప్రభుత్వం జారీ చేసిన గెజిట్‌ నోటిఫికేషన్‌తో వార్డుల పునర్విభజన ప్రక్రియకు చట్టబద్ధమైన అధికారిక రూపం లభించింది. స్థానిక సంస్థల ఎన్నికల వేడి క్రమంగా పెరుగుతున్న తరుణంలో చిత్తూరు కార్పొరేషన్‌ వార్డుల సంఖ్య 60కి ఖరారు కావడం నగర రాజకీయాల్లో కీలక మలుపుగా మారింది. ఇక కొత్త వార్డుల పరిధులు, రిజర్వేషన్లు, అభ్యర్థుల ఎంపిక చుట్టూ రాజకీయ వర్గాల్లో మరింత వేడి చర్చలు జరిగే అవకాశముంది.
