చిత్తూరు డిసిఎంఎస్ లో కోటి రూపాయలు స్వాహా

వసూళ్ళ కుంభకోణం: డిసిఎంఎస్‌ను ముంచుతున్న అధికారుల కూటమి

పేపర్లలోనే వసూళ్లు,  డిసిఎంఎస్‌ను దోచుకున్న అదృశ్య అప్పుదారులు

డిసిఎంఎస్‌లో వెలుగుచూసిన అక్రమాల అసలు రూపం

సమాచార హక్కు చట్టంతో వెలుగులోకి వచ్చిన వైనం 

*చిత్తూరు బ్యూరో, ఆంధ్రప్రభ.*

చిత్తూరు జిల్లా సహకార మార్కెటింగ్ సొసైటీ పరిస్థితి కాలక్రమేణా కుంగిపోతూ, అందులోని అక్రమాలు ప్రజల ముందుకు ఒక్కో పొరలా బయటపడుతున్నాయి. బకాయిలు కోట్ల రూపాయలకు చేరినా, వాటిని వసూలు చేయాల్సిన బాధ్యత వహించే ఉద్యోగులు మాత్రం చేతులు ముడుచుకుని కూర్చోవడం సంఘాన్ని మూతపడే దిశగా నెడుతోంది. వసూలు చేయాలి అంటే ఏదో పెద్ద పాపం చేస్తున్నట్టుగా, చిరునామా లేదు, వ్యక్తి చనిపోయాడు, ఎక్కడ ఉన్నాడో తెలియదు వంటి చవకబారు సాకులతో అసలు పనిని పక్కన పెట్టేసి, ప్రజల డబ్బును నీరుగార్చడమే ప్రధానంగా సాగుతోంది. ఉద్యోగుల నిర్లక్ష్యం, అక్రమాలే ఇప్పుడు సంఘ పడవను ముంచడానికి కారణం అవుతున్నాయని ప్రతి పేజీ చెబుతున్న ఆర్‌టీఐ వివరాలు స్పష్టంగా చెబుతున్నాయి. 

చిత్తూరు సొసైటీ వ్యవస్థ రైతులకు అప్పులు ఇవ్వదు. కానీ ఎరువులు, విత్తనాలు, పురుగు మందులు వంటి వ్యవసాయ అవసరాలన్నీ సింగిల్ విండోల ద్వారా రైతులకు చేరుస్తుంది. సొసైటీ ముందుగా సరఫరా చేసి, సింగిల్ విండో అమ్మిన తర్వాత ఆ మొత్తాన్ని తిరిగి సొసైటీకి జమ చేయాలి. కానీ ఈ మొత్తం వ్యవస్థలో పెద్ద రంధ్రం పడిపోయి, జమ కావాల్సిన మొత్తం 96.70 లక్షల రూపాయలు పెండింగ్‌గా పేరుకు పోయింది. ఇందులో అత్యంత కలవరపెట్టే అంశం ఏమిటంటే, సొసైటీ మాజీ మేనేజర్ ఎం. వెంకటరెడ్డి ఒంటరిగానే సుమారు 6.24 లక్షల రూపాయలను స్వాహా చేసినా, అతనిపై ఎటువంటి చర్యను ఇప్పటి వరకు సొసైటీ అధికారులు తీసుకోలేదు. ఇది రైతు వ్యవస్థలో పడ్డ విలయం ఎంత లోతైనదో చూపిస్తుంది. ఈ మొత్తం స్వాహా పురాణంను బయటపెట్టింది తవణంపల్లి మండలం కొండరాజు కాలువకు చెందిన సుదర్శన్ నాయుడు. సమాచార హక్కు చట్టం కింద అడిగిన వివరాలను అధికారులు ఎన్నో రోజులు ఆలస్యం చేసి, తర్వాత ఇస్తే… అందులో కనిపించిన గల్లంతైన డబ్బులు, మాయమైన చిరునామాలు, కట్టుకోని బకాయిలు చూసి ఎవరికైనా తల తిరుగుతుందనడంలో సందేహమే లేదు. సమాచార హక్కు చట్టం కింద బయటపడిన రికార్డులు సొసైటీ బకాయిలను రెండు రకాలుగా వర్గీకరించింది. మొదటి రకంలో  19 మంది పాత బకాయిదారులు. వీరు 8.88 లక్షల రూపాయలు సొసైటీకి ఇప్పటికీ చెల్లించలేదు. వీరిలో చాలామంది చనిపోయినట్టు చూపించి, చిరునామాలు దొరకలేదని, వారసుల ఆచూకీ లేదని పరిష్కారం కాకుండా సమస్యను ఏళ్ల తరబడి లాగేస్తున్నారు. ఆశ్చర్యకరమైన విషయం ఏమిటంటే, ఇందులో మాజీ మేనేజర్ వెంకటరమణ రెడ్డి పేరు కూడా ఉంది. అతను చెల్లించాల్సిన మొత్తం 6.24 లక్షలు, కానీ అతని పేరును ఒకసారి చనిపోయిన దానిలో, మరోసారి బతికిన జాబితాలో చేర్చడం సొసైటీ నిర్వహణ ఎంత దారిద్య్రంలో పడిపోయిందో చూపిస్తుంది. 1972 నుంచి ఈ బకాయిలు పేరుకు పోతుండగా, ఉద్యోగులు ఏ చర్యా తీసుకోకపోవడం ప్రజల అసంతృప్తికి కారణమైంది.

రెండవ జాబితాలో 9 మంది కొత్త బకాయిదారులు ఉన్నారు. వీరు మొత్తంగా 87.82 లక్షల రూపాయలు సొసైటీకి చెల్లించాలి. ఇదే సొసైటీ వ్యవస్థను దెబ్బతీస్తున్న ప్రధాన భాగం. ఇందులో కూడా మాజీ మేనేజర్ వెంకటరమణ రెడ్డి పేరు ఉండటం సంచలనం. వసూలు చేయాల్సినవారే బకాయిదారులై ఉండటం సొసైటీ ఏ స్థాయిలో నడుస్తోందో తెలియజేస్తోంది. ఈ జాబితాలలో ఒకరి పేరును ఒక చోట చనిపోయినట్టు, మరొక చోట బతికినట్టు చూపించడం, ఏ పట్టణంలో ఉన్నారో చెప్పకపోవడం, ఆస్తులు లేవని పేర్కొనడం అందరినీ అనుమానాస్పదంగా చూస్తున్నాయి. ముఖ్యంగా సింగిల్ విండో పరిధిలో పనిచేసే అధ్యక్షుడు రైతులే ఎన్నుకునే వ్యక్తి. ఇలాంటి వ్యక్తుల చిరునామాలు లేవని, వారసుల ఆచూకీ లేదని, బకాయిల వసూలు చేయలేదని చెప్పడం ప్రజల్లో ఆగ్రహాన్ని రేకెత్తిస్తోంది. ఒక రాజకీయ పార్టీకి చెందిన వ్యక్తులైనా, వారు ప్రజలకు తప్పించుకోలేని వ్యక్తులే. కానీ ఇక్కడ మాత్రం వారి చుట్టూ గోడలు కట్టినట్టుగా వసూలు వ్యవస్థ పనిచేయడం లేదు. ఇది యాదృచ్ఛికం కాదు, దాచే ప్రయత్నం అన్న అనుమానాలు బలంగా వెల్లువెత్తుతున్నాయి. ఇంకా పాత బకాయిల విషయానికి వస్తే, 19 మంది వ్యక్తులు సంవత్సరాల నుంచి వేలల్లో ఉన్న బకాయిలను చెల్లించలేదు. ఒక్కోరి పేరుపై 10 నుండి 35 వేల మధ్య ఉంటే, మొత్తం 1,54,067 రూపాయలు వసూలు కావాల్సి ఉంది.  ధర్మయ్య నాయుడు,  వెంకటరెడ్డి,  వెంకటారెడ్డి,  అంజనేయులు నాయుడు,  మునిరెడ్డి వంటి వ్యక్తులు పదేళ్ల తరబడి బకాయి చెల్లించకపోయినా, ఉద్యోగులు వసూలు పత్రాలు పంపకుండా, ఫైలులను డ్రాయర్లలో దాచిపెట్టడం మాత్రమే చేసారు. వసూలు చేయాలి అన్న ఆలోచన ఉద్యోగులకే లేదంటే బకాయిదారులే కాదు… అధికారులు కూడా కుమ్మక్కై ఉన్నారని ప్రజల అభిప్రాయం. కొత్త బకాయిదారుల 92 లక్షల దగ్గర నిలిచే బొమ్మ మరింత గందరగోళంగా ఉంటుంది. ఎ. వెంకటరెడ్డి, జి. బి. నాగరాజు , ఎ. వెంకటులు, జ. సూర్యనారాయణ వంటి వారి పేర్లపై లక్షల్లో బకాయిలు ఉన్నా… ఎవరిపై చర్యలు లేవు. ముఖ్యంగా ఇద్దరు పెద్ద బకాయిదారులు కలిసి దాదాపు 85 లక్షలు చెల్లించకపోవడం సంఘాన్ని ఆర్థికంగా నరికి పడేసినట్టే. దీనిని పరిశీలిస్తే, సొసైటీకి వచ్చిన వసూలు వ్యవస్థ పూర్తిగా స్తంభించింది. ఉద్యోగులు తీసుకుంటున్న జీతాలకు ఏమాత్రం సమర్థత చూపకపోవడం, ప్రజల డబ్బుతో నడిచే సంస్థను నేలదించే దిశగా నడుస్తోంది. పాత బకాయిలు వసూలు కాకుండా, కొత్త బకాయిలు పెరుగుతూ ఉండగా… చివరికి సంఘం సంక్షోభానికి గురై, మూతపడే పరిస్థితి తలెత్తే ప్రమాదం ఉందని నిపుణులు హెచ్చరిస్తున్నారు. రైతుల కోసం ఉండే సొసైటీ, ఉద్యోగుల చేతుల్లో ఈ స్థాయిలో దెబ్బతినడానికి కారణం ఎవరు? వసూలు లేని నిర్లక్ష్య ధోరణికి ఎక్కడ ఆపిల్ వేయాలి? ఇంత పెద్ద మొత్తాలు గాలిలో కలిసిపోయినా చర్యలు ఎందుకు లేవు? అనేది అన్నింటికన్నా పెద్ద ప్రశ్న. ఇంకా ఆలస్యం జరిగితే, చిత్తూరు మార్కెటింగ్ సొసైటీ ఆర్థికంగా పూర్తిగా కుప్పకూలిపోవడం ఖాయం. 

ప్రజల డబ్బు కాబట్టి… వసూలు చేయడం ఉద్యోగుల కర్తవ్యం. అదే తిరస్కరిస్తే, సొసైటీ కాదు, ప్రజల విశ్వాసమే మునిగిపోతుంది.

గంగ 2 చిత్తూరు జిల్లా సహకార మార్కెటింగ్ సొసైటీ

గంగ 3 స్వాహా పురాణాన్ని వెలుగులోకి తెచ్చిన సుదర్శన్ నాయుడు