చిత్తూరులో హెచ్‌ఐవీ పరిస్థితి ఆందోళనకరం

ప్రజలతో పాటు గర్భిణీ మహిళల్లోనూ హెచ్‌ఐవీ కేసులు నమోదు  

గణాంకాలు ప్రభుత్వం ముందు కొత్త సవాళ్లు

నేడు ప్రపంచ ఎయిడ్స్ దినోత్సవం

*చిత్తూరు బ్యూరో, ఆంధ్రప్రభ *

 చిత్తూరు జిల్లాలో హెచ్‌ఐవీ పరిస్థితి ఇంకా ఆందోళనకరంగానే కొనసాగుతున్నట్లు స్పష్టంచేస్తోంది. గత మూడేళ్ల గణాంకాలను పరిశీలిస్తే జనరల్ ప్రజల్లోనూ, గర్భిణీ మహిళల్లోనూ ప్రతి ఏడాది గణనీయ సంఖ్యలో పాజిటివ్ కేసులు గుర్తుకువస్తున్నాయి. పరీక్షల వ్యవస్థ విస్తరణ, మొబైల్ ఐసీటీసీల సేవలు పెరుగుతుండటంతో కేసులు గుర్తించబడుతున్నప్పటికీ, ఈ సంఖ్యలు జిల్లాలో హెచ్‌ఐవీ పూర్తిగా అదుపులోకి రాలేదనే సంకేతం ఇస్తున్నాయి. 2023–24  ఏడాదిలో 58,280 మంది పరీక్షలు చేయించుకోగా 292 మందిలో హెచ్‌ఐవీ పాజిటివ్ నిర్ధారణ అయింది. ఇది 0.5 శాతం. 2024–25లో పరీక్షలు పెరిగి 62,537 కు చేరగా, 252 మందికి పాజిటివ్ నిర్ధారణ అయింది. శాతం 0.4 గా నమోదైంది. 2025 అక్టోబర్ వరకు  47,454 మంది పరీక్షించుకోగా 168 మందిలో పాజిటివ్ బయటపడింది. ఇది 0.36 శాతంగా ఉంది. 

ఈ సంఖ్యలను పోల్చితే శాతం కొంత తగ్గినట్లే ఉన్నా, మొత్తం కేసుల పరంగా సంఖ్య మాత్రం తగ్గలేదని కనిపిస్తోంది. పరీక్షలకు ముందుకొస్తున్న వారి సంఖ్య పెరిగినా, పాజిటివ్ కేసులు నిలకడగా నమోదవుతుండటం ఆరోగ్య శాఖ ముందు పెద్ద సవాలుగా మారింది. అందోళన తగ్గినా కేసులు పూర్తిగా తగ్గలేదు. 2023–24లో గర్భిణీ స్త్రీల్లో 52,578 పరీక్షలు జరగగా 9 పాజిటివ్ కేసులు నమోదయ్యాయి. శాతం 0.08. 2024–25 లో 31,297 పరీక్షల్లో 13 పాజిటివ్ కేసులు బయటపడ్డాయి. ఇది 0.04 శాతం. 2025 లో  అక్టోబర్ వరకు 22,430 పరీక్షల్లో 5 పాజిటివ్ కేసులు నమోదు అయ్యాయి. శాతం 0.02 కు తగ్గింది. శాతం తగ్గటం సానుకూలమైతే కూడా, గర్భిణీ మహిళల్లో పాజిటివ్ కేసులు రాకపోవడం వరకు ప్రభుత్వం చర్యలు బలోపేతం చేయాల్సిన అవసరం ఉందని నిపుణులు అభిప్రాయపడుతున్నారు. గర్భిణీలకు ముందస్తు పరీక్షలు, నిరంతర కౌన్సెలింగ్, తల్లి నుండి బిడ్డకు వ్యాధి సంక్రమణ నిరోధ చర్యలు నిరంతరం కొనసాగుతున్నాయి. నివేదికలో కేసుల పెరుగుదలకు ఖచ్చిత కారణాలు వెల్లడించకపోయినా, సురక్షితం కాని లైంగిక సంబంధాలు, రక్షణ లేని రక్త మార్పిడి, శుభ్రపరచని సూదులు–సిరంజిల వాడకం ప్రధాన కారణాలని అధికారులు చెబుతున్నారు. గ్రామీణ ప్రాంతాల్లో అవగాహన లోపం, సిగ్గు–మంచి చెడు భావనలు పరీక్షలకు అడ్డుతగులుతున్నాయి. దీంతో హెచ్‌ఐవీ ఎలా వస్తుంది అన్నదానికంటే, హెచ్‌ఐవీ ఎలా రాదు అన్న అంశంపై ప్రజలకు స్పష్టమైన అవగాహన కల్పించాల్సిన పరిస్థితి ఏర్పడింది. దోమకాటు, కరచాలనం, కలిసి భోజనం, పళ్లెం, గ్లాస్ పంచుకోవడం వంటి వాటివల్ల వ్యాధి రాదని తెలియజేయడం అత్యవసరం. జిల్లాలో ప్రస్తుతం 77 ఐసీటీసీలు, 2 ఏఆర్టీ కేంద్రాలు, 5 లింక్ ఏఆర్టీ కేంద్రాలు, 3 సురక్షా క్లినిక్‌లు ప్రజలకు సేవలందిస్తున్నాయి. మొబైల్ ఐసీటీసీలు 68 శిబిరాలు నిర్వహించి 3452 మందిని పరీక్షించాయి. ఈ విస్తరణతో మరిన్ని కేసులు బయటపడటం సహజమే కాగా, చికిత్సను సమయానికి అందించడానికి ఇది సహకరిస్తోంది. గర్భిణీ స్త్రీలను మూడో నెల నుంచే పరీక్షించి, పాజిటివ్‌గా నిర్ధారణ అయ్యే వారికి వెంటనే చికిత్స ప్రారంభం అవుతోంది. చికిత్సను పూర్తిగా పాటిస్తే బిడ్డకు వైరస్ సంక్రమణను 95 శాతం వరకు నివారించవచ్చని వైద్యులు చెబుతున్నారు. హెచ్‌ఐవీ ఉన్న అనేకరు ఇప్పటికీ సమాజంలో వివక్షను ఎదుర్కొంటున్నారు. ఉద్యోగం, అద్దె ఇల్లు, విద్యా ప్రదేశాల్లో అనవసర భయం, అపోహలతో బాధపడుతున్నవారిని అధికార యంత్రాంగం గుర్తిస్తోంది. హెచ్‌ఐవీ చట్టం  2017 కింద రోగుల గోప్యత, హక్కుల రక్షణ వంటి అంశాల్లో ప్రభుత్వం కఠిన చర్యలు తీసుకోవాల్సిన సమయం ఆసన్నమైందని నిపుణులు సూచిస్తున్నారు. 

ఎయిడ్స్ నివారణ కొరకు ...

ఎయిడ్స్ నివారణ కొరకు 95 శాతం ప్రజలు తమ హెచ్‌ఐవీ స్థితి తెలుసుకోవాలి. పాజిటివ్‌గా నిర్ధారణ అయిన వారిలో 95 శాతం చికిత్సలోకి రావాలి. చికిత్సలో ఉన్న వారిలో 95 శాతం వైరస్‌ను పూర్తిగా అదుపులో ఉంచాలి. చిత్తూరు జిల్లా ఈ లక్ష్యాలను చేరుకునే దిశగా అడుగులు వేస్తున్నప్పటికీ, గణాంకాలు ఇంకా మెరుగుదలకు పెద్ద అవకాశం ఉందని స్పష్టం చేస్తున్నాయి. ఇందుకు గ్రామీణ ప్రాంతాల్లో అవగాహన కార్యక్రమాల విస్తరణ జరగాలి. పాఠశాలలు, కళాశాలల్లో యువతకు ప్రత్యేక మార్గదర్శక శిక్షణ ఇవ్వాలి. మందుల పాటింపుపై కఠిన పర్యవేక్షణ ఉండాలి. రోగులకు గోప్యత, రక్షణ కల్పించే వ్యవస్థ బలోపేతం కావాలి. ప్రమాదంలో ఉన్న వర్గాలపై లక్ష్యిత చర్యలు తీసుకోవాలి. జిల్లాలో పరీక్షల సంఖ్య పెరగడం మంచి పరిణామం. కానీ పాజిటివ్ కేసులు పూర్తిగా తగ్గే వరకు అవగాహన, రక్షణ చర్యలు, చికిత్స పాటింపు వంటి అంశాల్లో సమూహంగా పనిచేయాల్సిన అవసరం ఉంది. హెచ్‌ఐవీ కేవలం వైద్య సమస్య కాదు; అది ఒక సామాజిక బాధ్యత. ప్రజలు, ప్రభుత్వం, వైద్య సంస్థలు కలిసి పనిచేసినప్పుడే హెచ్‌ఐవీ వ్యాప్తిని పూర్తిగా అదుపులోకి తేవడం సాధ్యమవుతుంది.

గంగ 1 ఎయిడ్స్