చూడ పేరు మార్పు ... పరిధి జిల్లా మొత్తం

చూడ పేరు మార్పు ... పరిధి జిల్లా మొత్తం

చిత్తూరు పలమనేరు కుప్పం అర్బన్ డెవలప్‌మెంట్ అథారిటీగా మార్పు

జిల్లాలోని అన్ని మండలాలు చూడ పరిధిలోకి

28 మండలాలు.. 774 రెవెన్యూ గ్రామాలు.. 4,604.11 చదరపు కిలోమీటర్ల పరిధి

సిపికె అర్బన్ డెవలప్మెంట్ అథారిటీకి పెరగనున్న నిధులు, విధులు

(చిత్తూరు బ్యూరో, ఆంధ్రప్రభ.)

చిత్తూరు అర్బన్ డెవలప్‌మెంట్ అథారిటీ (సీహెచ్‌యూడీఏ) పరిధిని రాష్ట్ర ప్రభుత్వం భారీగా పునర్వ్యవస్థీకరించింది. ఇకపై సీహెచ్‌యూడీఏను చిత్తూరు పలమనేరు కుప్పం అర్బన్ డెవలప్‌మెంట్ అథారిటీ (సీపీకే యూడీఏ)గా వ్యవహరించనున్నారు. పట్టణాభివృద్ధి, పట్టణ పరిసర ప్రాంతాల ప్రణాళిక, భూవినియోగం, మౌలిక వసతుల అభివృద్ధి, పరిపాలనను సమన్వయంతో నిర్వహించేందుకు ఈ మార్పు చేపట్టినట్లు ప్రభుత్వం స్పష్టం చేసింది. ఈ మేరకు పురపాలక పరిపాలన, పట్టణాభివృద్ధి శాఖ ముఖ్య కార్యదర్శి ఎస్. సురేష్‌కుమార్ సోమవారం జీఓ ఎంఎస్ నంబర్ 195ను జారీ చేశారు..గతంలో చిత్తూరు అర్బన్ డెవలప్‌మెంట్ అథారిటీ పరిధిలో చిత్తూరు నగరపాలక సంస్థతో పాటు 22 మండలాల్లోని 434 గ్రామాలు ఉండేవి. ఈ పరిధి మొత్తం 3,501.14 చదరపు కిలోమీటర్లుగా ఉండేది. 2019లో ప్రభుత్వం సీహెచ్‌యూడీఏను ఏర్పాటు చేసి చిత్తూరును ప్రధాన కేంద్రంగా నిర్ణయించింది. ఆ తర్వాత పరిపాలనా అవసరాలు, జిల్లాల పునర్వ్యవస్థీకరణకు అనుగుణంగా పలు దఫాల్లో పరిధిలో మార్పులు చేశారు.

2025 డిసెంబరు 31 నుంచి జిల్లాలు, రెవెన్యూ డివిజన్ల పరిధిలో ప్రభుత్వం మార్పులు చేసిన నేపథ్యంలో పట్టణాభివృద్ధి సంస్థల పరిధులను కూడా ఆయా జిల్లాల పునర్వ్యవస్థీకరణకు అనుగుణంగా మార్చాల్సిన అవసరం ఏర్పడింది. ఈ నేపథ్యంలో రాష్ట్ర పట్టణ, దేశ ప్రణాళిక సంచాలకుడు సమర్పించిన ప్రతిపాదనలను ప్రభుత్వం పరిశీలించి సీహెచ్‌యూడీఏను పునర్వ్యవస్థీకరించింది. కొత్తగా ఏర్పాటైన సీపీకే యూడీఏ పరిధిలో 4 పట్టణ స్థానిక సంస్థలు, 28 పూర్తి మండలాలు, 774 రెవెన్యూ గ్రామాలు ఉంటాయి. మొత్తం పరిధి 4,604.11 చదరపు కిలోమీటర్లు. చిత్తూరు నగరపాలక సంస్థతో పాటు పాలమనేరు, కుప్పం, నగరి మున్సిపాలిటీలు ఇందులో భాగమయ్యాయి. అంటే చిత్తూరు నగరంతో పాటు జిల్లాలోని కీలక పట్టణ ప్రాంతాలు, ఉత్తర చిత్తూరు ప్రాంతంలోని విస్తృత మండలాలు ఒకే పట్టణాభివృద్ధి సంస్థ పరిధిలోకి వచ్చాయి. సీపీకే యూడీఏ పరిధిలోకి కొత్తగా పలమనేరు, కుప్పం, నగరి మున్సిపాలిటీలను చేర్చారు. అలాగే పలమనేరు, గంగవరం, పెద్దపంజాణి, బైరెడ్డిపల్లె, వెంకటగిరికోట, కుప్పం, శాంతిపురం, గుడుపల్లె, రామకుప్పం, కార్వేటినగరం, నగరి, నిండ్ర, విజయపురం, వెదురుకుప్పం మండలాలను పూర్తి మండలాలుగా చేర్చారు. ఈ 14 మండలాల్లో కలిపి 456 రెవెన్యూ గ్రామాలు ఉన్నాయి. కొత్త పరిధిలోని మండలాల వివరాలు పరిశీలిస్తే పాలమనేరు మండలంలో 17 రెవెన్యూ గ్రామాలు, గంగవరం 16, పెద్దపంజాణి 31, బైరెడ్డిపల్లె 25, వెంకటగిరికోట 34, కుప్పం 66, శాంతిపురం 60, గుడుపల్లె 49, రామకుప్పం 38, కార్వేటినగరం 26, నగరి 29, నిండ్ర 15, విజయపురం 18, వెదురుకుప్పం 32 గ్రామాలు ఉన్నాయి. ఇదే సమయంలో సీహెచ్‌యూడీఏ పరిధి నుంచి అన్నమయ్య జిల్లాకు చెందిన 10 మండలాలను పూర్తిగా తొలగించారు. నిమ్మనపల్లె, చౌడేపల్లె, సదుం, కలికిరి, వాల్మీకిపురం, సోమల, పీలేరు, గుర్రంకొండ, కలకడ, కంభంవారిపల్లె మండలాలు ఇకపై సీపీకే యూడీఏ పరిధిలో ఉండవు. ఈ 10 మండలాల్లో మొత్తం 167 రెవెన్యూ గ్రామాలు ఉన్నాయి.

పునర్వ్యవస్థీకరణ అనంతరం సీపీకే యూడీఏ పరిధిలో చిత్తూరు నగరపాలక సంస్థ, పాలమనేరు మున్సిపాలిటీ, కుప్పం మున్సిపాలిటీ, నగరి మున్సిపాలిటీలు ఉన్నాయి. మండలాల వారీగా చూస్తే పాలసముద్రం, కార్వేటినగరం, నగరి, నిండ్ర, విజయపురం, చిత్తూరు రూరల్, చిత్తూరు అర్బన్, గుడిపాల, యాదమరి, గంగాధర నెల్లూరు, పూతలపట్టు, పెనుమూరు, తవణంపల్లె, ఐరాల, పులిచెర్ల, రొంపిచెర్ల, శ్రీరంగరాజపురం, వెదురుకుప్పం, బంగారుపాళెం, పాలమనేరు, గంగవరం, పెద్దపంజాణి, బైరెడ్డిపల్లె, వెంకటగిరికోట, కుప్పం, శాంతిపురం, గుడుపల్లె, రామకుప్పం ఉన్నాయి. కొత్త పరిధిలో కుప్పం మండలం అత్యధికంగా 66 రెవెన్యూ గ్రామాలతో ఉంది. శాంతిపురంలో 60, గుడుపల్లెలో 49, రామకుప్పంలో 38, గంగాధర నెల్లూరులో 35, వెంకటగిరికోటలో 34, వెదురుకుప్పంలో 32, పెద్దపంజాణిలో 31, నగరిలో 29, కార్వేటినగరంలో 26, బంగారుపాళెంలో 27 గ్రామాలు ఉన్నాయి. విస్తీర్ణం పరంగా కూడా కుప్పం మండలమే ముందంజలో ఉంది. కుప్పం మండలం 429.96 చదరపు కిలోమీటర్ల విస్తీర్ణం కలిగి ఉంది. పెద్దపంజాణి 244.24, వెదురుకుప్పం 254.10, కార్వేటినగరం 216.60, గంగాధర నెల్లూరు 200.07, బంగారుపాళెం 200.85, వెంకటగిరికోట 191.25, చిత్తూరు రూరల్ 186.58 చదరపు కిలోమీటర్ల విస్తీర్ణంలో ఉన్నాయి. చిత్తూరు జిల్లాలోని గ్రామీణ, పట్టణ ప్రాంతాలను ఒకే సమగ్ర పట్టణాభివృద్ధి ప్రణాళికలోకి తీసుకురావడం ఈ పునర్వ్యవస్థీకరణలో ప్రధాన అంశంగా కనిపిస్తోంది. పట్టణాల చుట్టూ వేగంగా విస్తరిస్తున్న నివాస ప్రాంతాలు, పారిశ్రామిక ప్రాంతాలు, రహదారులు, మౌలిక వసతులు, భవిష్యత్తులో చేపట్టాల్సిన అభివృద్ధి కార్యక్రమాలకు సమగ్ర ప్రణాళిక రూపొందించేందుకు యూడీఏ పరిధి కీలకం కానుంది. అయితే ప్రభుత్వం జారీ చేసిన ఉత్తర్వుల్లో నిర్దిష్టంగా ఏయే కొత్త ప్రాజెక్టులు లేదా మౌలిక వసతులు చేపడతారన్న వివరాలను మాత్రం వెల్లడించలేదు. ఉత్తర్వుల్లో సమన్వయ పట్టణాభివృద్ధి, సమర్థవంతమైన ప్రాదేశిక ప్రణాళిక, పట్టణ–పట్టణ పరిసర ప్రాంతాల నిర్వహణను లక్ష్యాలుగా పేర్కొంది. ప్రత్యేకంగా కుప్పం, పాలమనేరు, నగరి వంటి ప్రధాన పట్టణాలు ఒకే యూడీఏ పరిధిలోకి రావడం వల్ల ఆయా పట్టణాల భవిష్యత్ విస్తరణ, పట్టణ పరిసర ప్రాంతాల అభివృద్ధి, భూవినియోగ ప్రణాళికలకు ఒకే సంస్థ ద్వారా మార్గదర్శకత్వం లభించనుంది. కుప్పం పరిసర ప్రాంతాల్లోని 66 గ్రామాలు, శాంతిపురం 60, గుడుపల్లె 49, రామకుప్పం 38 గ్రామాలు కూడా ఈ పరిధిలోకి రావడంతో ఉత్తర చిత్తూరు ప్రాంతంలో యూడీఏ పరిధి గణనీయంగా విస్తరించింది. 2016 ఆంధ్రప్రదేశ్ మెట్రోపాలిటన్ రీజియన్ అండ్ అర్బన్ డెవలప్‌మెంట్ అథారిటీస్ చట్టంలోని నిబంధనల ఆధారంగా ప్రభుత్వం ఈ మార్పులు చేసింది. పునర్వ్యవస్థీకరించిన సీపీకే యూడీఏ పరిధి ఆంధ్రప్రదేశ్ గెజిట్‌లో నోటిఫికేషన్ ప్రచురితమైన తేదీ నుంచి అమల్లోకి వస్తుంది. తదుపరి అవసరమైన చర్యలను సీపీకే యూడీఏ ఉపాధ్యక్షుడు చేపట్టాలని ప్రభుత్వం ఆదేశించింది. మొత్తంగా చూస్తే, గతంలో 3,501.14 చదరపు కిలోమీటర్ల పరిధిలో ఉన్న సీహెచ్‌యూడీఏ ఇప్పుడు 4,604.11 చదరపు కిలోమీటర్లకు విస్తరించింది. గ్రామాల సంఖ్య కూడా 434 నుంచి 774కు పెరిగింది. పేరులో చిత్తూరుతో పాటు పలమనేరు, కుప్పం ప్రాంతాలకు ప్రాధాన్యం కల్పిస్తూ కొత్తగా సీపీకే యూడీఏగా రూపాంతరం చెందింది. జిల్లాల పునర్వ్యవస్థీకరణకు అనుగుణంగా పట్టణాభివృద్ధి సంస్థల పరిధులను కూడా మార్చిన రాష్ట్ర ప్రభుత్వం, భవిష్యత్ పట్టణ గ్రామీణ ప్రాంతాల సమగ్ర అభివృద్ధికి ఈ కొత్త వ్యవస్థను ఉపయోగించనుంది.