రేపటినుంచి ఇంటర్ పబ్లిక్ పరీక్షలు

పరీక్షల నిర్వహణకు పకడ్బందీగా ఏర్పాట్లు 

భారీ పోలీసు బందోబస్తు, 144 అమలు

నాలుగు సిటింగ్ స్క్వాడ్లు, రెండు ఫ్లయింగ్ స్క్వాడ్లు

పరీక్షా కేంద్రాల వద్ద సీసీ కెమెరాలుతో పర్యవేక్షణ

ఆంధ్రప్రభతో జిల్లా ఇంటర్ విద్యార్థి విద్యాశాఖ అధికారి

(ఆంధ్రప్రభ బ్యూరో, చిత్తూరు.)

జిల్లాలో ఇంటర్మీడియట్ పబ్లిక్ పరీక్షలు ఫిబ్రవరి 23 సోమవారం తేదీ నుండి ప్రారంభం కానున్న నేపథ్యంలో జిల్లా యంత్రాంగం అత్యంత పకడ్బందీగా అన్ని ఏర్పాట్లు పూర్తి చేసింది. విద్యార్థులు ప్రశాంత వాతావరణంలో, ఎటువంటి అవాంఛనీయ ఘటనలు లేకుండా పరీక్షలు రాసేలా సంప్రదాయ క్రమశిక్షణతో సమగ్ర ప్రణాళిక రూపొందించామని జిల్లా ఇంటర్ విద్యాశాఖ అధికారి  ఎ. రఘుపతి ఆంధ్ర ప్రభతో ప్రత్యేకంగా మాట్లాడుతూ తెలిపారు. పరీక్షల నిర్వహణలో పారదర్శకత, భద్రత, సమయపాలనకు అత్యధిక ప్రాధాన్యత ఇస్తున్నామని ఆయన స్పష్టం చేశారు. ఈ ఏడాది జిల్లావ్యాప్తంగా మొత్తం 29,279 మంది విద్యార్థులు ఇంటర్ పబ్లిక్ పరీక్షలకు హాజరుకానుండగా, అందులో ప్రథమ సంవత్సరం 14,729 మంది, ద్వితీయ సంవత్సరం 14,550 మంది ఉన్నట్లు వివరించారు. విద్యార్థుల సంఖ్యను దృష్టిలో ఉంచుకుని జిల్లా వ్యాప్తంగా 50 పరీక్షా కేంద్రాలను ఏర్పాటు చేసి, ప్రతి కేంద్రంలో అవసరమైన మౌలిక సదుపాయాలు పూర్తి స్థాయిలో కల్పించినట్లు తెలిపారు. ముఖ్యంగా ప్రతి విద్యార్థికి వేర్వేరుగా బల్లలు, సరిపడా కూర్చునే ఏర్పాట్లు చేసి సౌకర్యవంతమైన పరీక్షా వాతావరణాన్ని కల్పించినట్లు వెల్లడించారు.

పరీక్షల సజావుగా నిర్వహణ కోసం 600కు పైగా ఇన్విజిలేటర్లను విధుల్లో నియమించగా, వారికి ప్రత్యేక మార్గదర్శకాలు జారీ చేసినట్లు తెలిపారు. పరీక్షల్లో ఎటువంటి మాల్‌ప్రాక్టీస్‌కు తావులేకుండా ఆరు సిట్టింగ్ స్క్వాడ్లు, రెండు ఫ్లయింగ్ స్క్వాడ్లు నిరంతరం తనిఖీలు నిర్వహిస్తాయని పేర్కొన్నారు. అదేవిధంగా ప్రతి పరీక్షా కేంద్రంలో సీసీ కెమెరాల ద్వారా నిరంతర పర్యవేక్షణ ఉండేలా ఏర్పాట్లు పూర్తి చేసినట్లు చెప్పారు. పరీక్షా కేంద్రాల వద్ద భారీ పోలీసు బందోబస్తు ఏర్పాటు చేయబడుతుందని, శాంతిభద్రతల దృష్ట్యా పరీక్షా కేంద్రాల పరిసర ప్రాంతాల్లో 144 సెక్షన్ అమలు చేయనున్నట్లు జిల్లా ఇంటర్ విద్యాశాఖ అధికారి తెలిపారు. పరీక్షల సమయంలో గుమికూడే పరిస్థితులు లేకుండా పోలీసులు కట్టుదిట్టమైన భద్రతా చర్యలు చేపడతారని చెప్పారు. అలాగే పరీక్షా కేంద్రాల సమీపంలోని జిరాక్స్ సెంటర్లను తాత్కాలికంగా మూసివేయాలని ఆదేశాలు జారీ చేసినట్లు వెల్లడించారు.

విద్యార్థుల ఆరోగ్యాన్ని దృష్టిలో ఉంచుకుని ప్రతి పరీక్షా కేంద్రంలో తాగునీటి సౌకర్యం, విద్యుత్, ఫ్యాన్లు, శుభ్రత వంటి కనీస వసతులు కల్పించినట్లు తెలిపారు. అత్యవసర పరిస్థితుల కోసం ప్రధమ చికిత్స (ఫస్ట్ ఎయిడ్) కేంద్రాలను ఏర్పాటు చేసి, అవసరమైతే వైద్య సిబ్బందిని అందుబాటులో ఉంచినట్లు పేర్కొన్నారు. వేసవి వేడి తీవ్రతను దృష్టిలో ఉంచుకుని పరీక్షా గదుల్లో సరైన గాలి ప్రసరణ ఉండేలా ప్రత్యేక జాగ్రత్తలు తీసుకున్నట్లు వివరించారు. దూర ప్రాంతాల నుంచి పరీక్షా కేంద్రాలకు వచ్చే విద్యార్థులకు ఎలాంటి ఇబ్బందులు కలగకుండా ఆర్టీసీ ద్వారా ఉచిత ప్రయాణ సౌకర్యం కల్పించబడిందని ఆయన తెలిపారు. విద్యార్థులు ఈ సౌకర్యాన్ని సద్వినియోగం చేసుకుని సమయానికి పరీక్షా కేంద్రాలకు చేరుకోవాలని సూచించారు. ముఖ్యంగా పరీక్ష ప్రారంభానికి కనీసం అరగంట ముందే కేంద్రానికి చేరుకోవాలని, ఆలస్యంగా వచ్చే వారికి ఇబ్బందులు తలెత్తే అవకాశం ఉందని హెచ్చరించారు.

హాల్ టికెట్ తప్పనిసరిగా వెంట తీసుకురావాలని, మొబైల్ ఫోన్లు, ఎలక్ట్రానిక్ గాడ్జెట్లు, నిషేధిత వస్తువులు పరీక్షా కేంద్రాల్లోకి అనుమతించబడవని స్పష్టం చేశారు. నిబంధనలను అతిక్రమించిన పక్షంలో కఠిన చర్యలు తీసుకుంటామని జిల్లా ఇంటర్ విద్యాశాఖ అధికారి హెచ్చరించారు. ప్రశ్నాపత్రాల రవాణా, భద్రతా భద్రపరచడం వంటి అంశాలపై ప్రత్యేక భద్రతా వ్యవస్థ అమలు చేస్తున్నట్లు తెలిపారు. వికలాంగ విద్యార్థులకు ప్రత్యేక సదుపాయాలు, గ్రౌండ్ ఫ్లోర్ గదులు, అవసరమైన చోట రైటర్లు వంటి సౌకర్యాలు కల్పించినట్లు ఆయన వెల్లడించారు. తల్లిదండ్రులు విద్యార్థులను ఒత్తిడికి గురి చేయకుండా ప్రోత్సహించాలని, పరీక్షలను భయంతో కాక ఆత్మవిశ్వాసంతో ఎదుర్కొనాలని సూచించారు. క్రమశిక్షణతో, సమయపాలనతో పరీక్షలకు హాజరవడం ద్వారా విద్యార్థులు మంచి ఫలితాలు సాధించాలని జిల్లా ఇంటర్ విద్యాశాఖ అధికారి రఘుపతి గారు ఆకాంక్షించారు. జిల్లాలో సంప్రదాయబద్ధంగా, పారదర్శకంగా పరీక్షలు నిర్వహించేందుకు అన్ని శాఖలు సమన్వయంతో పనిచేస్తున్నాయని, ఎటువంటి అవాంఛనీయ ఘటనలకు తావులేకుండా విజయవంతంగా పరీక్షలు నిర్వహించేందుకు యంత్రాంగం సిద్ధంగా ఉందని ఆయన ధృవీకరించారు.

గంగ 2 డిఐఈఓ రఘుపతి