రూ. 10,134 కోట్లతో చిత్తూరు మీదుగా చెన్నై, బెంగళూరు హైస్పీడ్ రైల్ కారిడార్

435 కిలోమీటర్ల పొడవులో 90 కిలోమీటర్ల మార్గం చిత్తూరు జిల్లా పరిధిలో 

హైస్పీడ్ కారిడార్ ప్రాథమిక పనుల కోసంఈ ఏడాది రూ. 2,500 కోట్లు కేటాయింపు

మొదటి విడతగా రూ. 800 కోట్ల నిధులు  విడుదల

చిత్తూరు జిల్లాలో భూసేకరణ, సర్వేలు, సాంకేతిక అధ్యయనాలకు 

చిత్తూరు నుండి చెన్నై లేదా బెంగళూరుకు కేవలం 25 నుండి 30 నిమిషాల్లోనే 

రామాపురం వద్ద అత్యాధునిక హైస్పీడ్ స్టేషన్‌ను నిర్మాణం 

సరికొత్త రవాణా హబ్‌గా అవతరించనున్న చిత్తూరు 

(ఆంధ్రప్రభ బ్యూరో, చిత్తూరు.)

దక్షిణ భారత రవాణా ముఖచిత్రంలో చిత్తూరు నగరం ఒక సరికొత్త రవాణా హబ్‌గా అవతరించబోతుంది. కేంద్ర బడ్జెట్ 2026 27లో ప్రకటించిన నిధుల కేటాయింపులు ఈ చారిత్రాత్మక మార్పుకు బలమైన ఆర్థిక పునాది వేశాయి. దేశవ్యాప్తంగా ప్రతిపాదించిన హైస్పీడ్ రైల్ కారిడార్ల కోసం సుమారు రూ. 16 లక్షల కోట్ల పెట్టుబడులను అంచనా వేసిన కేంద్ర ప్రభుత్వం, ఆంధ్రప్రదేశ్ రైల్వే ప్రాజెక్టులకే ఈ ఆర్థిక సంవత్సరంలో రికార్డు స్థాయిలో రూ. 10,134 కోట్లు కేటాయించడం విశేషం. ఆ భారీ నిధుల ప్రవాహంలో కీలక భాగంగా చెన్నై బెంగళూరు మైసూర్ హైస్పీడ్ రైల్ కారిడార్ చిత్తూరు జిల్లా అభివృద్ధి చరిత్రలో సువర్ణ అధ్యాయానికి నాంది పలుకుతోంది. ఈ ప్రతిష్టాత్మక ప్రాజెక్టును అమలు చేస్తున్న సంస్థ నేషనల్ హై స్పీడ్ రైల్ కార్పొరేషన్ లిమిటెడ్  ఇప్పటికే సమగ్ర ప్రాజెక్టు నివేదికను సిద్ధం చేసి రైల్వే శాఖకు సమర్పించింది. కేంద్ర రైల్వే మంత్రి అశ్వినీ వైష్ణవ్ వెల్లడించిన ప్రకారం, ఈ కారిడార్ ప్రారంభ దశ పనుల కోసం భూసేకరణ, సివిల్ నిర్మాణాలు, సాంకేతిక సర్వేలకు ప్రత్యేకంగా నిధులు విడుదల అవుతున్నాయి. రాష్ట్ర ప్రభుత్వ భాగస్వామ్యంతో అమలవుతున్న ఈ ప్రాజెక్టులో మొత్తం అంచనా వ్యయం సుమారు రూ. 1.15 లక్షల కోట్లకు చేరుకోగా, అందులో 50 శాతం కేంద్ర ప్రభుత్వం భరిస్తోంది. మిగిలిన వాటాలో ఆంధ్రప్రదేశ్ తన పరిధిలోని మార్గం మేరకు దశలవారీగా సుమారు రూ. 12,000 కోట్లను సమకూర్చాల్సి ఉంది.

ప్రాథమిక పనుల కోసం రూ. 2,500 కోట్లు 

ప్రస్తుత ఆర్థిక సంవత్సరానికి కేటాయించిన రూ. 10,134 కోట్లలో, హైస్పీడ్ కారిడార్ ప్రాథమిక పనుల కోసం సుమారు రూ. 2,500 కోట్లను ప్రత్యేకంగా గుర్తించగా, అందులో మొదటి విడతగా రూ. 800 కోట్లు ఇప్పటికే విడుదలయ్యాయి. ఈ నిధులు ప్రధానంగా చిత్తూరు జిల్లాలో భూసేకరణ పరిహారం చెల్లింపులు, సర్వేలు, సాంకేతిక అధ్యయనాలకు వినియోగించనున్నారు. ఆంధ్రప్రదేశ్ భాగంలో దాదాపు 988 హెక్టార్ల భూమి అవసరమవుతుందని అంచనా. మొత్తం 435 కిలోమీటర్ల పొడవునా విస్తరించే ఈ హైస్పీడ్ కారిడార్‌లో సుమారు 90 కిలోమీటర్ల మార్గం చిత్తూరు జిల్లా పరిధిలోకి రావడం జిల్లాకు జాతీయ స్థాయి ప్రాధాన్యాన్ని తెచ్చిపెట్టింది. చిత్తూరుకు సమీపంలోని గుడిపాల మండలం రామాపురం వద్ద ప్రాంతాల మధ్య అత్యాధునిక హైస్పీడ్ స్టేషన్‌ను నిర్మించేందుకు ప్రాథమిక స్థల గుర్తింపులు పూర్తయ్యాయి. జాతీయ రహదారి 40కి అనుసంధానంగా, ప్రస్తుత రైల్వే స్టేషన్ సమీపంలో ఈ హబ్ రూపుదిద్దుకోనుంది. ఇది విమానాశ్రయ తరహా సదుపాయాలతో కూడిన భారీ వాణిజ్య సముదాయంగా ఉండబోతోంది.

చెన్నై లేదా బెంగళూరుకు కేవలం 25  నిమిషాలు

హై స్పీడ్ రైల్వే కారిడార్ కోసం తమిళనాడులో చెన్నై సెంట్రల్, పూనమల్లి, పరందూర్ (కొత్త విమానాశ్రయం సమీపంలో)వద్ద, జిల్లాలో చిత్తూరు సమీపంలోని రామపురం, పలమనేరు వద్ద కర్ణాటకలో కోలార్ సమీపంలోని హుడుకుల, బంగారుపేట, హోస్కోట్ సమీపంలోని కోడిహళ్లి, బెంగళూరులోని వైట్‌ఫీల్డ్ మరియు బైయప్పనహళ్లి వద్ద అత్యాధునిక రైల్వే స్టేషన్ లను నిర్మించనున్నారు. గంటకు గరిష్టంగా 350 కి.మీ. వేగంతో ప్రయాణించే ఈ రైళ్లు చిత్తూరు నుండి చెన్నై లేదా బెంగళూరుకు కేవలం 25 నుండి 30 నిమిషాల్లోనే చేరుకునే అవకాశం కల్పిస్తాయి. ఇది జీవనశైలిలో విప్లవాత్మక మార్పుకు దారి తీస్తుంది. మెట్రో నగరాల్లో ఉద్యోగాలు చేసే యువత చిత్తూరులో నివసిస్తూ రోజువారీ ప్రయాణం చేయగలుగుతారు. దీనివల్ల చిత్తూరు నగరం వేగంగా ఒక నివాస కేంద్రంగా ఎదుగుతుంది. ముఖ్యమంత్రి నారా చంద్రబాబు నాయుడు ఈ ప్రాజెక్టుపై ప్రత్యేక దృష్టి సారిస్తూ, చిత్తూరు నుంచి తిరుపతికి అనుసంధాన మార్గం ఏర్పాటుపై కేంద్రాన్ని కోరడం జిల్లా ప్రాధాన్యాన్ని మరింత పెంచింది. ఈ కారిడార్ పూర్తిగా ఎలివేటెడ్ మార్గంగా నిర్మించనుండటంతో నగర ట్రాఫిక్‌కు ఎటువంటి అంతరాయం ఉండదు.

2030 నాటికి ఈ ప్రాజెక్టును పూర్తి

ఆర్థిక కోణంలో ఈ ప్రాజెక్టు చిత్తూరు జిల్లాలో పారిశ్రామిక వృద్ధికి వేగం చేకూరుస్తుంది. బెంగళూరు ఐటీ రంగం, చెన్నై తయారీ రంగంతో జిల్లా నేరుగా అనుసంధానం అవ్వడం వల్ల పెట్టుబడులు పెరుగుతాయి. రియల్ ఎస్టేట్ రంగం ఇప్పటికే చైతన్యం పొందింది. హోటల్, పర్యాటక, సేవా రంగాలు విస్తరించనున్నాయి. పర్యావరణ పరంగా కూడా విద్యుత్ శక్తితో నడిచే ఈ రైళ్లు కాలుష్యం తగ్గించడంలో సహాయపడతాయి. 2030 నాటికి ఈ ప్రాజెక్టును పూర్తి చేసి ప్రయాణికులకు అందుబాటులోకి తీసుకురావాలనే లక్ష్యంతో కేంద్రం వేగంగా చర్యలు చేపడుతోంది. మొత్తానికి, రూ. లక్షల కోట్ల జాతీయ ప్రణాళికలో భాగమైన ఈ హైస్పీడ్ కారిడార్ చిత్తూరును దక్షిణాది అభివృద్ధి అక్షంలో కీలక కేంద్రంగా నిలబెడుతోంది. రవాణా, ఉపాధి, పెట్టుబడులు, మౌలిక వసతులు  అన్ని రంగాల్లోనూ ఈ బుల్లెట్ రైలు చిత్తూరు భవిష్యత్తుకు మహా వేగాన్ని అందించబోతోంది. 

గంగ 1 చిత్తూరు రైల్వే స్టేషన్ 

గంగ 2 బుల్లెట్ ట్రైన్

గంగ 3 రూట్ మ్యాప్