పిల్లల ఎదుగుదలను అడ్డుకొనే నులిపురుగులు

నేడే జాతీయ నులిపురుగుల దినోత్సవం

ఆంధ్రప్రభ బ్యూరో, చిత్తూరు.

మట్టి ద్వారా సంక్రమించే నులిపురుగులు పిల్లల  మానసికంగా,  శారీరకంగా ఎదుగుదలను   బలహీనపరుస్తుంది. ఇన్ఫెక్షన్లు రక్తహీనత, పోషకాహార లోపం కలుగచేసి, పాఠశాలలో చురుకుదనాన్ని తగ్గిస్తాయి. భారతదేశం లో పిల్లలలో ఒక ముఖ్యమైన ప్రజారోగ్య సమస్య. 1-19 సంవత్సరాల వయస్సు గల దాదాపు 22 కోట్ల మంది భారతీయ పిల్లలు నులిపురుగుల ఇన్ఫెక్షన్ల ప్రమాదంలో ఉన్నారని అంచనా. పిల్లలలోని నులిపురుగులు పోషకాలను తీసుకోవడంలో ఆటంకం కలిగిస్తాయి. రక్తహీనత, పోషకాహార లోపం మరియు మానసిక, శారీరక అభివృద్ధిని దెబ్బతీస్తాయి. ఈ సమస్యను ఎదుర్కోవడానికి, 2015లో భారత ప్రభుత్వం 1-19 సంవత్సరాల వయస్సు గల పిల్లలందరికీ నులిపురుగులను తొలగించడానికి అంగన్‌వాడీ,  పాఠశాల ఆధారిత జాతీయ నులిపురుగుల నిర్మూలన దినోత్సవాన్ని ప్రారంభించింది. జాతీయ నులిపురుగుల నిర్మూలన దినోత్సవాన్ని అన్ని రాష్ట్రాలు, కేంద్రపాలిత ప్రాంతాలలో 2 రౌండ్లలో నిర్వహిస్తారు. మొదటి రౌండ్ ఫిబ్రవరి 10న, రెండవ రౌండ్ ప్రతి సంవత్సరం ఆగస్టు 10న నిర్వహిస్తారు. 

1-19 సంవత్సరాల మధ్య వయస్సు గల ప్రీస్కూల్, పాఠశాల వయస్సు గల పిల్లలందరికీ పాఠశాలలు, అంగన్‌వాడీ కేంద్రాల వేదిక ద్వారా ఆరోగ్యం, పోషక స్థితి, విద్య, జీవన నాణ్యతను మెరుగుపరచడానికి నులిపురుగులను తొలగించడం జాతీయ నులిపురుగుల నిర్మూలన దినోత్సవ లక్ష్యం. దేశంలోని ప్రతి బిడ్డను నులిపురుగుల రహితంగా భారత ప్రభుత్వ ఆరోగ్యం, కుటుంబ సంక్షేమ మంత్రిత్వ శాఖ ప్రయత్నం. ఇది తక్కువ వ్యవధిలో పెద్ద సంఖ్యలో పిల్లలను చేరుకునే అతిపెద్ద ప్రజారోగ్య కార్యక్రమాలలో ఒకటి. నేల ద్వారా వ్యాపించే నులిపురుగులు పెద్ద పురుగులు ఆహారం, మనుగడ కోసం మానవ ప్రేగులలో నివసిస్తాయి. ప్రతిరోజూ వేల గుడ్లను ఉత్పత్తి చేస్తాయి. వ్యాధి సోకిన వ్యక్తి మలంలో గుడ్లు విసర్జించబడతాయి. ఆరుబయట మలవిసర్జన చేసే వ్యాధి సోకిన వ్యక్తులు నేలలో పురుగు గుడ్లను వ్యాపిస్తారు. గుడ్లు మట్టిని కలుషితం చేయడం వలన అనేక విధాలుగా సంక్రమణను వ్యాపిస్తుంది. జాగ్రత్తగా ఉడికించని, కడగని లేదా తొక్క తీయని కూరగాయల ద్వారా తీసుకోవడం; కలుషితమైన నీటి వనరుల తీసుకోవడం; మట్టిలో ఆడుకుని, కడుక్కోకుండా నోటిలో చేతులు పెట్టుకునే పిల్లలకు వ్యాపిస్తుంది. నేల ద్వారా వ్యాపించే నులిపురుగులు  ఇన్ఫెక్షన్లు రక్తహీనత, పోషకాహార లోపం, మానసికంగా,  శారీరకంగా ఎదుగుదల  బలహీనపడటం, పాఠశాలలో చురుకుదనం తగ్గడానికి దారితీయవచ్చు. నేల ద్వారా వ్యాపించే నులిపురుగులను బయట మలవిసర్జన చేయకుండా, శానిటరీ టాయిలెట్లను ఉపయోగించడం, ముఖ్యంగా తినడానికి ముందు, టాయిలెట్ ఉపయోగించిన తర్వాత చేతులు కడుక్కోవడం, చెప్పులు, బూట్లు ధరించడం, పండ్లు మరియు కూరగాయలను సురక్షితమైన మరియు శుభ్రమైన నీటిలో కడగడం, సరిగ్గా వండిన ఆహారం తినడం వలన నివారించవచ్చును. పిల్లల మొత్తం ఆరోగ్యం, పోషకాహార స్థితి, పెరుగుదల, జీవన నాణ్యతను మెరుగుపరచడం జాతీయ నులిపురుగుల నిర్మూలన దినోత్సవ లక్ష్యం. అన్ని పేగుల్లో నులిపురుగులు ఉన్నాయని భావించి, ఆ రోజున 1 సంవత్సరం కంటే ఎక్కువ వయస్సు ఉన్న పిల్లలకు అల్బెండజోల్ అనే నులిపురుగుల నిర్మూలన మందులు ఇస్తారు. 6 సంవత్సరాల కంటే తక్కువ వయస్సు ఉన్న ఏ పిల్లవాడిని,  ఇంతకు మాత్రలు  తీసుకోని  పిల్లలను మాత్రం మాత్రలు మింగమని వత్తిడి చేయకూడదు. మతాలు అలవాటు లేకుండా మింగితే, ఒక్కోసారి పిల్లలు  ఉక్కిరిబిక్కిరి అయ్యే ప్రమాదం ఉంది. టాబ్లెట్‌ను పౌడర్ చేసి బిడ్డకు ఇవ్వవచ్చును. పెద్ద పిల్లలు  అయితే,  మాత్రలను  నమలమని చెప్పవచ్చును..

*జిల్లాలో సర్వం సిద్దం* 

జాతీయ నులిపురుగుల నిర్మూలన కార్యక్రమానికి చిత్తూరు జిల్లా సిద్ధమయ్యింది. సోమవారం 7,25,776 మంది పిల్లలకు డి వార్మింగ్ చేయనున్నారు. ప్రభుత్వ గణాంకాల ప్రకారం అంగన్వాడీ కేంద్రాలలో 76,924 మంది పిల్లలు, ప్రభుత్వ, ప్రైవేటు ప్రాథమిక, ప్రాథమిక ఉన్నత పాఠశాలలో 2,36,691 మంది, ప్రభుత్వ, ప్రైవేటు ఇంటర్మీడియట్, పాలిటెక్నిక్, నర్సింగ్ విద్యార్థులు 43,787 మంది, పాఠశాలల్లో 3,63,888 మంది వీరు కాకుండా బడి బయట 4,486 మంది 1నుంచి 19 వయసుగల విద్యార్థులు ఉన్నట్లు నిర్ధారించారు. వీరందరికీ సోమవారం డి వార్మింగ్ మాత్రలు  అందజేయనున్నారు. ఒకటి, రెండు సంవత్సరాల పిల్లలకు ఆల్బెండజోల్ అర మాత్ర,  2 -19 సంవత్సరాల పిల్లలకు ఆల్బెండజోల్ ఒక మాత్ర మింగిస్తారు. ఆశ, అంగన్వాడీ కార్యకర్తలు గ్రామంలోని అంగనవాడి, ప్రాథమిక పాఠశాల, బడి  బయట ఉన్న విద్యార్థులకు ఈ మాత్రలు అందచేస్తారు.  ప్రాథమిక, ఉన్నత పాఠశాలలోని విద్యార్థులకు ఉన్నత రెసిడెన్షియల్, ఆశ్రమ, మోడల్ స్కూల్, కేజీబీ, గురుకుల, మైనార్టీ పాఠశాలలోని విద్యార్థులకు మగ, ఆడ ఆరోగ్య పర్యవేక్షకుల ద్వారా ఈ మాత్రలను మధ్యాహ్న భోజనం తర్వాత అందచేస్తారు. ముందుగా పాఠశాలలో ఉపాధ్యాయులకు, సిబ్బందికి, ఆయా, వంట మనిషికి మింగించిన తర్వాత ఈ మాత్రలను విద్యార్థుల చేత మింగిస్తారు. ఈ కార్యక్రమాన్ని జిల్లా వైద్య ఆరోగ్య శాఖ, జిల్లా విద్యాశాఖ అధికారులు పర్యవేక్షిస్తున్నారు.

గంగ 1 జాతీయ నులిపురుగుల దినోత్సవం లోగో