సాటి గంగాధర్, చిత్తూరు
కలం, కల్యాణం, కర్తవ్యం - ఓ సంపూర్ణ గాథ
పుత్రమద్ది. చిత్తూరు జిల్లాలోని ఓ కుగ్రామం. గుడిసెలో సుబ్బన్న, వసంత దంపతులు. పేదరికం రాజ్యమేలుతున్నా, వారి కళ్లలో ఆశల దీపాలు మినుకుమినుకుమంటూ వెలుగుతూనే ఉన్నాయి. ఆ దంపతులకు పుట్టిన బిడ్డ గంగాధర్. బాల్యం కష్టాల కడలిలో ఓలలాడినా, గంగాధర్ మనసు మాత్రం ఎప్పుడూ ప్రజల గురించే ఆలోచించేది. బడిలో పుస్తకాలతో స్నేహం చేసేవాడు, బయట ఊరి ప్రజల కష్టాలు చూసి కదిలిపోయేవాడు. చిన్నప్పుడే నిర్ణయించుకున్నాడు.. తన కలం ప్రజల గొంతుక కావాలని.
ప్రాథమిక విద్య పుత్రమద్దిలో, ఉన్నత విద్య ఏం. పైపల్లిలో సాగింది. ఐరాల ప్రభుత్వ జూనియర్ కళాశాలలో ఇంటర్మీడియట్ పూర్తి చేశాడు. మదనపల్లి బి.టి. కళాశాలలో బి.కాం డిగ్రీ పొందాడు. గుంటూరులో జర్నలిజంలో డిప్లొమా చేశాడు. మదనపల్లిలో డిగ్రీ చదువుతున్న రోజుల్లోనే ఆర్ఎస్ఎస్ పరిచయం అయ్యింది. అది ఆయన జీవితాన్ని మలుపు తిప్పింది. ఏబీవీపీలో చేరాడు. చిత్తూరు జిల్లా కన్వీనర్‌గా, ఆ తరువాత మదనపల్లిలో కొంతకాలం పూర్తి సమయ కార్యకర్తగా పనిచేశాడు. గుంటూరు నగర ఏబీవీపీ సంఘటనా కార్యదర్శిగా రెండేళ్లు పనిచేశాడు.
1992లో ఈనాడు దినపత్రికతో ఆయన జర్నలిజం ప్రయాణం మొదలైంది. తిరుపతి, చిత్తూరులలో పనిచేశాడు. ఆ తరువాత ఆంధ్రజ్యోతి, సూర్య దినపత్రికలకు స్టాఫ్ రిపోర్టర్‌గా చిత్తూరులో పనిచేశాడు. ప్రస్తుతం ఆంధ్రప్రభ దినపత్రికకు చిత్తూరు జిల్లా బ్యూరో చీఫ్‌గా పనిచేస్తున్నాడు. చౌడేపల్లి నుండి వెలువడే పాఠశాల, మా బడి మాస పత్రికలలో, వెలుగుబాట వారపత్రికలో, విజేత దినపత్రికలో, తెలుగు నాడు, జనం కోసం వంటి దినపత్రికలలో కూడా పనిచేశాడు. ఎక్స్‌ప్రెస్ న్యూస్ సర్వీసు వంటి న్యూస్ ఏజెన్సీలోనూ, ఎస్సీవీ కేబుల్, ఇన్ కేబుల్ వంటి కేబుల్ నెట్‌వర్క్‌లలోనూ అనుభవం గడించాడు.
గంగాధర్ కలం పదునెక్కింది. నిజం కోసం నిలబడేవాడు. అవినీతి, అక్రమాలను ఎండగట్టేవాడు. ప్రజల సమస్యలను వెలుగులోకి తెచ్చేవాడు. ఆయన వార్తలు అధికారుల గుండెల్లో రైళ్లు పరిగెత్తించేవి. ప్రజలు ఆయనను అభిమానించేవారు. జర్నలిజం ఆయనకు జీవనాధారం, సమాజ సేవ ఆయనకు ప్రాణం. పత్రికా రంగంలో రాజకీయ వార్తలు రాయడంలో ఆయన ఉద్దండుడు. అవినీతి, అక్రమాలను వెలుగులోకి తీసుకురావడంలో ఆయనకు తిరుగులేదు. మూడు దశాబ్దాల జర్నలిజం కెరీర్‌లో మచ్చలేని వ్యక్తిగా, నీతి నిజాయితీలకు మారుపేరుగా నిలిచాడు.
జంగం కులస్తుల కష్టాలు ఆయనను కదిలించాయి. చిత్తూరులో జర్నలిస్టుగా పనిచేస్తూనే జిల్లా జంగం సంక్షేమ సంఘం స్థాపించాడు. గత 25 ఏళ్లుగా దానికి గౌరవాధ్యక్షుడిగా ఉన్నాడు. ఆ తరువాత ఆంధ్రప్రదేశ్ రాష్ట్ర జంగం సంక్షేమ సంఘంకు రాష్ట్ర కార్యదర్శిగా ఐదేళ్లు, రాష్ట్ర అధ్యక్షుడిగా మూడేళ్లు పనిచేశాడు. కుల ధృవీకరణ పత్రాల్లో ‘భిక్షాటన’ అనే పదాన్ని తొలగించాలని రాష్ట్రవ్యాప్తంగా ఉద్యమాలు చేశాడు. రాష్ట్ర ప్రభుత్వ అధికారులందరికీ వినతి పత్రాలు అందజేశాడు. ఫలితంగా, కొంతకాలం ఆ పదాన్ని తొలగించారు. జంగమ సంక్షేమ సంఘం అభివృద్ధికి చేసిన సేవలకు గాను చిత్తూరు, పలమనేరు, మదనపల్లి, తిరుపతి, గుంటూరు, రాజమండ్రి, కాకినాడ, శ్రీకాకుళం ప్రాంతాలలో ఆయనకు అనేక సత్కారాలు, సన్మానాలు లభించాయి.
గంగాధర్ జీవితం కేవలం వార్తలు రాయడం, సంఘం నడపడంకే పరిమితం కాలేదు. ఆయన ప్రేమ వివాహం చేసుకున్నాడు. అది కూడా కులాంతర వివాహం. 1993లో శారదను ప్రేమించి పెళ్ళి చేసుకున్నాడు. పెనుమూరులోని కోదండ రామాలయంలో వారి వివాహం జరిగింది. పెళ్లికి పెనుమూరుకు చెందిన సీనియర్ పాత్రికేయులు దామోదర్ రెడ్డి, లోకనాథ్ ఆచార్యులు పూర్తి సహాయ సహకారాలు అందించారు. చిత్తూరు శాసనసభ్యుడిగా ఉండిన సీకే బాబు అండదండలతో ఎంతో శ్రమించి ప్రేమ వివాహం చేసుకున్నాడు. పుత్రమద్ది గ్రామంలోని మొట్టమొదటి కులాంతర వివాహం చేసుకొని, తర్వాత కులాంతర వివాహాలకు మార్గదర్శకంగా నిలిచాడు. అప్పట్లో పెద్దలను ఎదిరించి చేసుకున్న కులాంతర వివాహం చుట్టుపక్కల గ్రామాల్లో తీవ్ర చర్చనీయాంశంగా మారింది. ఆయనకు ఇద్దరు కూతుళ్లు. పెద్ద కూతురు గౌతమి చిత్తూరు విద్యాశాఖలో ఉద్యోగం చేస్తుంది. చిన్న కూతురు యోషిత హైదరాబాద్ లో B. ఫార్మసీ చేసి ఉద్యోగం చేస్తుంది. గంగాధర్ గారి పెళ్లి రోజు 16.1.1993. ప్రథమ పుత్రిక గౌతమి 1994 లో జన్మించింది. ద్వితీయ పుత్రిక యోషిత 8.10.1997 లో జన్మించింది.
ఈనాడు దినపత్రికలో పనిచేస్తున్న సమయంలో స్వర్గీయ రామోజీరావు గారి దగ్గరనుంచి ప్రశంసా పత్రాలు అందుకున్నాడు. ఆంధ్రప్రదేశ్ వర్కింగ్ జర్నలిస్ట్ ఫెడరేషన్ చిత్తూరు జిల్లా గౌరవ అధ్యక్షుడిగా ఎన్నికయ్యాడు.
సాటి గంగాధర్.. నిప్పు కణం లాంటి జీవితం నుండి జ్వాలలా ఎదిగిన వ్యక్తి. కలంతో ప్రజల కష్టాలు తీర్చే కర్మయోగి. కళ్యాణంతో ప్రేమను పంచే మానవుడు. కర్తవ్యంతో సమాజాన్ని అభివృద్ధి చేసే నాయకుడు. ఆయన జీవితం మనందరికీ ఆదర్శం.
